AQSh ta’lim muassasalariga irqi tufayli o‘quvchini qabul qilmaslik taqiqlandi

AQShda ta’lim muassasalariga qabul qilishda irqiy mansublikni hisobga olish taqiqlandi, deb yozmoqda “Meduza”.

2011-yili Oq uy maktablar va oliy ta’lim muassasalariga qabul vaqtida irqiy mansublikni hisobga olish haqida rasmiy qaror chiqargan edi.

Hujjatga ko‘ra, ta’lim dargohlari ma’muriyatlari muassasada irqiy xilma-xillikni hisobga olgan holda o‘quvchini qabul qilish yoki qabul qilmaslikka qaror qilgan.

Mazkur qarorning qabul qilinishiga qadar Jorj Bush-kichkina davrida qabul qilingan qonun amalda bo‘lgan. Unga ko‘ra, universitet va kollejlar o‘quvchilarni qabul qilishda irqiy mansublikka neytral qarashi kerak bo‘lgan.

O‘tgan haftada ta’lim vazirligi rasmiy saytida Bush-kichkina davridagi qaror e’lon qilingan. 3-iyul, seshanba kuni ta’lim va adliya vazirliklari Obama davrida ijobiy diskriminatsiya to‘g‘risida qabul qilingan qonunni bekor qilishini xabar qilgan. Kelib chiqishiga ko‘ra osiyolik bo‘lgan AQSh fuqarolarining qilgan shikoyatlari Qonunning bekor qilinishiga sabab bo‘lgan.

Vazirlikning ma’lumot berishicha, 15-iyun kuni Garvard universitetiga 60 dan ortiq huquqni muhofaza qiluvchi tashkilotlar arz qilgan. Ular osiyolik fuqarolar huquqlarini himoya qilishni talab qilgan. Ularning fikricha, AQShdagi eng nufuzli universitetlardan biri osiyolik talabalarni qabul qilishdan bosh tortgan. Vaholanki, ular imtihonlarni boshqalardan yuqori baholarga topshirgan. Shunga qaramasdan, universitet ma’muriyati ularni qabul qila olmasligi, negaki ta’lim muassasasidagi irqiy muvozanat buzilishini aytgan. Garvard universiteti ma’muriyati aybini tan olmagan.

Hozircha arz bo‘yicha bir qarorga kelinmagan. Mamlakat bosh prokurori Jeff Seshns prezident Obama davrida qabul qilingan ijobiy irqiy diskriminatsiya to‘g‘risidagi qonunni “keraksiz, eski, amaldagi qonunchilikka zid” deb atagan.

Garvard universitetining matbuot xizmati talabalarni qabul qilishda ularning irqiy mansubligi hisobga olinishda davom etishini aytgan. Universitet huquqshunoslarining fikricha, ijobiy irqiy diskriminatsiya AQSh Oliy sudi tomonidan 40 yildan buyon qo‘llab-quvvatlanib kelmoqda.

Bosh prokuror Seshns yangi qonunga rioya qilmagan universitetlarga nisbatan chora ko‘rilishini ma’lum qilgan.