“Angren” EIZda bu yil 300 million dollarlik 15 ta loyiha amalga oshiriladi

“Angren” erkin iqtisodiy zonasida bu yil jami qiymati 300 million dollarga teng 15 ta yangi loyiha amalga oshiriladi, shuning 78 million dollarini to‘g‘ridan to‘g‘ri xorijiy investitsiyalar tashkil etadi, deb yozadi Spot.

Xususan, charmni qayta ishlash, po‘latdan choksiz trubalar va fitinglar, bezakli sopol plitkalar, konveyer tasmalari, qishloq xo‘jalik va avtomobil shinalari, elektr nasoslar, avtoklav gaz-betondan bloklar, metall konstruksiyalar va boshqalarni ishlab chiqarish bo‘yicha korxonalarni tashkil etish rejalashtirilmoqda.

EIZ vakili so‘zlariga ko‘ra, 2017-yilda korxonalar loyihalarni amalga oshirish doirasida 89,1 million miqdordagi investitsiyalarni o‘zlashtirgan. Bu 2016-yilgi ko‘rsatkichdan 57,1 foizga ko‘pdir. “Angren” hududida o‘tgan yilda 8,6 million dollarlik beshta yangi ishlab chiqarish obyektlari ochilgan, shuning 5,1 million dollari to‘g‘ridan to‘g‘ri xorijiy investitsiyalar ulushiga to‘g‘ri kelgan.