Qozog‘iston poytaxti Ostona shahrida 14-xalqaro “Yevrosiyo” kinofestivali bo‘lib o‘tmoqda, deb yozadi UZ24. Festivalga Yevropa, Boltiqbo‘yi mamlakatlari, Osiyo, Yaqin va Uzoq Sharqdan bir nechta davlatlardan kino ijodkorlar tashrif buyurgan. Mazkur festivalda 4 yo‘nalishda ish olib boriladi.
Yosh kino ijodkorlar kengashi hamda “Kinematografiyani rivojlantirish markazi” boshchiligidagi 14 kishidan iborat o‘zbek kino delegatsiyasi ham mazkur festivalga tashrif buyurdi. “Yevrosiyo” kinofestivalining asosiy tanloviga qo‘yilgan 12 ta film ichida, kinorejissor Rashid Malikovning “Sabot” deb nomlangan filmi ham g‘oliblik uchun kurashadi. Qisqa metrajli filmlar tanlovida esa yosh, umidli kinorejissorlar: Abduazim Ilhomjonov hamda Botir Abdurahmonovlarning “Mama” filmi ishtirok etyapti. Moskva xalqaro kinofestivalida hakamlar hay’atining maxsus sovriniga sazovor bo‘lgan “Sabot” filmi “Yevrosiyo” kinofestivali hay’at a’zolari hamda qozoq tomoshabinlari tomonidan ham qizg‘in kutib olindi.
“Karavan” deb nomlangan tanlovdan tashqari namoyishda kinorejissor Jahongir Qosimovning “Nazira” deb nomlangan badiiy filmi tomoshabinlar e’tiboriga havola etildi. “Yevrosiyo” kinofestivalidagi mazkur yo‘nalishda namoyish etilishi rejalashtirilgan yana bir o‘zbek filmi, kinorejissor Zulfiqor Musoqovning “Dadam betob” filmi esa festival talablariga javob beradigan varianti yetkazib berilmaganligi sabab dasturdan olib tashlandi.
O‘zbek kino sanoati vakillari ham festival doirasida tashkil etilgan kino bozorida o‘z pavilyonlari bilan ishtirok etdi. O‘zbek paviloni dunyo kino sanoatiga “Sabot”, “Nazira”, “Skorpion”, “Maqsad” hamda “Tinchlik ortida” badiiy filmlarini taqdim etdi.
Yosh kino ijodkorlar kengashi hamda Kinematografiyani rivojlantirish markazi tomonidan shu yilning oktabr oyida Toshkent shahrida o‘tkazilishi rejalashtirilayotgan PROLOGUE halqaro kinofestivali hamda “Yevrosiyo” kinofestivali tashkiliy qo‘mitasi o‘rtasida imzolangan hamkorlik shartnomasi, mamlakatlar o‘rtasidagi madaniy aloqalarni yanada rivojlantirish va ularni yangi bosqichga olib chiqish yo‘lida tashlangan yana bir yangi qadam bo‘ldi.
Izoh (0)