Olmazor tumanida 30 kishilik to‘y o‘tkazildi, tejalgan mablag‘ga yosh oilaga kreditga uy olib berildi

Toshkent shahar Olmazor tumanining “Tepaguzar” MFYda 30 kishilik to‘y o‘tkazildi, deb yozadi O‘zA MFY raisi Abduvali Umarjonovga tayanib.

“Mahallamizda ortiqcha isrofgarchiliksiz namunaviy to‘y o‘tkazdik. Bir yigit oila qurish niyatidaligini aytib, bizga murojaat qildi. Mahalla faollari o‘zaro kengashgan holda, 30 kishilik juda chiroyli va ixcham to‘y o‘tkazdik. To‘ydan tejalgan mablag‘ni esa hamkorlar bilan kelishib, yosh oilaga kredit asosida uy olib berishga sarfladik”, — dedi u.

Eslatib o‘tamiz, Olmazor tumanida 29-iyun kuni bo‘lib o‘tgan faollar yig‘ilishida O‘zbekiston Prezidenti Shavkat Mirziyoyev yana bir bor to‘y-marosimlar masalasiga to‘xtalib o‘tgan, olmazorliklarni 50 kishilik to‘y qilishni boshlab berib, butun Toshkentga namuna bo‘lishga chaqirgan edi.