2-iyul, dushanba kuni Musulmonlar idorasida Buyuk Britaniyaning Kembrij Markaziy Osiyo forumi raisi, professor Sidxart Saksena bilan uchrashuv o‘tkazildi. Bu haqda idora matbuot xizmati xabar berdi.
Uchrashuvda Islom sivilizatsiyasi markazi direktori Shoazim Minovarov, Imom Buxoriy xalqaro ilmiy-tadqiqot markazi direktori Shovosil Ziyodov, Xalqaro islom akademiyasi prorektori B.Mamadiyev, O‘zbekistonga oid xorijdagi madaniy boyliklarni tadqiq etish markazi direktori o‘rinbosari D.Rasulov va sharqshunos olim S.G‘ulomovlar ishtirok etdilar.
Uchrashuvda o‘zbekistonlik tadqiqotchilar maqolalarini Kembrij ilmiy jurnallarida nashr qilish bo‘yicha fikr almashildi. Kembrij universitetida faoliyat yuritayotgan “o‘zbek tili” kurslari tinglovchilari uchun o‘quv qo‘llanmalar tayyorlanayotgani ma’lum qilindi. “Buxoro yahudiylarining tarixi”, “Samarqand va Buxoro madrasalari” va “Mahdumi A’zam qabridagi yodgorlik yozuvlari katalogi” mavzularida hamkorlik qilinishi aytib o‘tildi.
Professsor S.Saksena O‘zbekistonda ko‘p marotaba bo‘lgani, lekin har galgi tashrif unga yangicha taassurot berishini ta’kidladi. U kelishilgan barcha tadbirlar bo‘yicha Kembrij universiteti tomoni aniq reja ishlab chiqqani va uning bosqichma-bosqich bajarilayotganini ma’lum qildi.
Yig‘ilish so‘nggida o‘zaro hamkorlik memorandumini imzolash marosimi bo‘lib o‘tdi.
Sidxart Saksena “Hazrati Imom” majmuasini ziyorat qildi.
Izoh (0)