AQSh razvedka xizmatlari o‘zlari qo‘lga kiritgan dalillarga asoslanib, KXDR o‘z yadro arsenalidan to‘liq voz kechmoqchi emasligi va buning o‘rniga o‘z ixtiyoridagi jangovar kallaklar sonini, shuningdek, qurol-yarog‘ ishlab chiquvchi harbiy obyektlarini yashirish usullarini ko‘rib chiqayotgani haqidagi xulosaga keldi, deb yozadi “TASS”.
The Washington Post maxsus xizmatlardagi manbalariga tayanib ma’lum qilishicha, 12-iyunda Singapurda bo‘lib o‘tgan Amerika—Shimoliy Koreya sammitidan keyin olingan ma’lumotlar AQSh razvedkasining yangi, avval noma’lum bo‘lgan xulosalarini tasdiqlaydi, ularga ko‘ra, KXDR “yadrosizlantirishni o‘tkazishi amri mahol”.
NBC telekompaniyasi xabar berishicha, Pxenyan so‘nggi oylarda yadro quroli yaratish uchun boyitilgan uran ishlab chiqarishni ko‘paytirgan. Markaziy razvedka boshqarmasi va boshqa idoralar taxmin qilishicha, Kim Chen In Vashington tomonidan KXDRning yadroviy dasturi borasida katta yon berishlarni kutayotgan bir paytda, u AQShni bunday obyektlar borligi haqida yanglishtirishi mumkin.
Izoh (0)