Bugun, 30-iyun sanasida futbol bo‘yicha Rossiya maydonlarida bo‘lib o‘tayotgan Jahon Chempionati nimchorak final bahslariga start berildi.
Hozirgina nimchorak finalning ilk uchrashuvi yakuniga yetdi. Antuan Grizmann yetakchiligidagi Fransiya termasi, Lionel Messi boshliq Argentinaga qarshi kurash olib bordi.
Uchrashuvda hisob Antuan Grizmann tomonidan 13-daqiqada ochildi. U Markos Roxoning qo‘polligi uchun belgilangan penaltini aniq amalga oshirdi. 41-daqiqada esa Anxel Di Mariya o‘zining kuchli va aniq zarbasi bilan hisobni tenglashtirdi.
Ikkinchi bo‘lim Argentina uchun omadli boshlandi. 48-daqiqada Messining zarbasini biroz o‘zgartirib yuborgan Gabriel Merkado jamoasini hisobda oldinga olib chiqdi. Shundan so‘ng Fransiyani to‘xtatib qolishning iloji qolmadi. 57-daqiqada Benjamin Pavar o‘ta kuchli zarba bilan hisobni tenglashtirdi. Oradan 7 daqiqa o‘tib, Kilian Mbappe Fransiyani hisobda oldinga olib chiqdi. Hech qancha o‘tmay, Mbappening o‘zi hisobni 4:2 ko‘rinishiga keltirib qo‘ydi. Uchrashuvga qo‘shib berilgan daqiqalarda esa o‘yinga zaxiradan maydonga tushgan Serxio Aguero hisobni qisqartirishga erishdi. O‘yin Fransiyaning g‘alabasi bilan yakunlandi.
Shu tariqa fransuzlar 1/4 finalning ilk ishtirokchisiga aylandi. Messi va uning Argentinasi esa uyiga ravona bo‘ladigan bo‘ldi.
Ha, aytgancha, “Daryo” so‘rovnomasida ishtirok etgan o‘quvchilarimizning 38 foiz qismi Messi va uning Argentinasi musobaqa bilan xayrlashishini taxmin etgandi.
Jahon Chempionati
1/8 final bellashuvi
30-iyun, shanba
Fransiya—Argentina 4:3
Gollar: 1:0 – 13, penalti Grizmann, 1:1 – 41 Di Mariya, 1:2 – 48 Merkado, 2:2 – 57 Pavar, 3:2 – 64 Mbappe, 4:2 – 68 Mbappe, 4:3 – 90+2 Aguero.Fransiya: Loris, Varan, Umtiti, Lyuka Ernandes, Pavar, Matyuidi (Tolisso, 75), Pogba, Kante, Jiru, Grizmann (Fekir, 83), Mbappe (Toven, 89).
Argentina: Armani, Maskerano, Otamendi, Merkado, Roxo (Fasio, 46), Talyafiko, Di Mariya, Banega, Peres (Aguero, 66), Pavon (Mesa, 75), Messi.
Ogohlantirishlar: Roxo (11), Talyafiko (19), Maskerano (43), Banega (50), Matyuidi (72), Pavar (73), Otamendi (90), Jiru (90).
Izoh (0)