Karimov Fondi vakillari Xitoyning Xanchjou shahrida bo‘lib o‘tgan an’anaviy to‘qimachilik dastgohlari va to‘quvchilik hunari texnologiyalariga bag‘ishlangan simpoziumda ishtirok etdi. Bu haqda fondning Facebook’dagi sahifasida xabar qilindi.
Simpozium doirasida Xitoy milliy shoyi muzeyida (dunyodagi eng katta shoyi muzeyi) A World of Looms: Weaving Technology and Textile Arts in China and Beyond (To‘quvchilik dastgohlari olami: Xitoy va undan tashqarida to‘quvchilik texnikasi va to‘qimachilik mahsulotlari) ko‘rgazmasi bo‘lib o‘tdi. Ko‘rgazmada dunyoning turli davlatlari, jumladan, O‘zbekistonning to‘qimachilik dastgohlari va texnologiyalari namoyish etildi.
Anjumanda Xitoy, Yaponiya, Laos, Indoneziya, AQSh, Hindiston, Niderlandiya, Daniya, Fransiya, Madagaskar va O‘zbekistondan tashrif buyurgan olim va mutaxassislar ishtirok etdi.
Karimov Fondi vakili — san’atshunos Binafsha Nodir “O‘zbek abr matolari — an’anaviy dastgoh va to‘qimachilik texnologiyalari” mavzusida ma’ruza qildi.
Anjuman doirasida bo‘lib o‘tgan seminarda marg‘ilonlik usta-abrband Rasul Mirzaahmedov o‘zbek abr matolarini yaratish jarayoni va texnologiyalarini namoyish etdi.
2017-yili Fond tomonidan abrbandi usulidagi to‘quvchilik maktabiga bag‘ishlangan “O‘zbek ipagining gulgun fasli” kitobi o‘zbek, rus va ingliz tillarida, chop qilingan. Shuningdek, marg‘ilonlik mashhur Mirzaahmedovlar sulolasining ijodiy merosiga bag‘ishlangan “Avlodlarni bog‘lovchi rishta” katalogi nashr etilgan.
Toshkent kashtachilik san’atini qayta tiklashga bag‘ishlangan ko‘rgazmani tashkil etish ishlari fond tomonidan olib borilmoqda. Ko‘rgazma 2018-yilning kuziga rejalashtirilgan.
Izoh (0)