Bugun, 28-iyun kuni o‘z ishini boshlagan Oliy Majlis Senatining o‘n beshinchi yalpi majlisida “Mediatsiya to‘g‘risida”gi O‘zbekiston Respublikasi qonuni ma’qullandi. Bu haqda “Daryo” muxbiri Sevara Nishonova xabar bermoqda.
Qonun yuzasidan Senatning Qonunchilik va sud-huquq masalalari qo‘mitasi raisi o‘rinbosari Tolibjon Madumarov ma’ruza qildi. Mediatsiyaning maqsadi — nizolashuvchi taraflarning nizolarini mustaqil, o‘zaro foydali shartlar asosida hal etish imkoniyatini topishga ko‘maklashishdan iborat bo‘lib, uning asosiy tamoyillariga ixtiyoriylik taraflarning tengligi, mediatorning xolisligi, maxfiylik kabilar kiradi.
Bugungi kunda O‘zbekistonda mediatsiyaga o‘xshash yarashtiruv protseduralari turli nizolarni hal etishda qo‘llanilmoqda. Fuqarolarning o‘zini o‘zi boshqarish organlari tomonidan nizolashayotgan taraflarni (qo‘shnilar o‘rtasidagi nizolar, oilaviy nizolar) yarashtirish faoliyatini ham mediatsiya namoyoni sifatida ko‘rish mumkin.
O‘zbekistonda avvaldan mahalla oqsoqoli qo‘shnilar, oila a’zolari, er-xotin o‘rtasidagi nizolarni hal etish vazifasini bajargan. Ammo ushbu protseduralar “mediatsiya” termini bilan atalmaydi. “Mediatsiya to‘g‘risida”gi qonun 4 bob va 34 ta moddadan iborat. Qonunga muvofiq, uning amal qilishi fuqarolik huquqiy munosabatlardan, shu jumladan tadbirkorlik faoliyatini amalga oshirish munosabati bilan kelib chiqadigan, shuningdek yakka mehnat nizolari va oilaviy huquqiy munosabatlardan kelib chiqadigan nizolarga mediatsiyani qo‘llash bilan bog‘liq munosabatlarga nisbatan, agar qonunda boshqacha qoida nazarda tutilmagan bo‘lsa, tatbiq etiladi.
Qonunning 25 ta moddasida mediatsiyani qo‘llash chog‘idagi cheklovlar belgilangan bo‘lib, bu kelgusida kelib chiqishi mumkin bo‘lgan nizolarning oldini olishga xizmat qiladi.
Izoh (0)