25-iyun, dushanba kuni ertalab Toshkent shahar IIBBga Ahmadali A. o‘g‘irlikka duch kelgani yuzasidan murojaat qildi. Bu haqda IIBB matbuot xizmati ma’lum qildi.
U o‘z arizasida Mirobod tumanidagi o‘ziga tegishli bo‘lgan uydan hujjatlar, katta miqdordagi milliy va chet el valyutalari hamda boshqa qimmatbaho buyumlar saqlanadigan seyfning o‘g‘irlanganini xabar qildi. Voqea joyiga yetib kelgan tezkor-qidiruv guruhi xodimlari o‘g‘rilik sodir bo‘lgan joyni sinchkovlik bilan ko‘zdan kechirdi va Jinoyat kodeksining 169-moddasi (o‘g‘rilik) bilan jinoiy ish qo‘zg‘atildi.
Toshkent shahar IIBB va Mirobod tuman IIO FMB xodimlarining tezkor harakatlari natijasida jinoyatchilar foydalangan avtomobil aniqlandi. Seshanba kuni ertalab gumondorlardan biri qo‘lga olindi. Bir necha soat ichida jinoyat sodir etganlikda gumon qilingan yana 3 kishining shaxsini aniqlashga muvaffaq bo‘lindi. Ulardan biri jabrlanuvchining qarindoshi bo‘lib chiqdi. Qo‘lga olinganlarning ko‘rsatmalariga ko‘ra, Ahmadalining ana shu qarindoshi jinoyatni uyushtirgani va uy kalitini olgani ma’lum bo‘ldi.
Gumondorlardan yana biri — Ratmir D.ning so‘zlariga ko‘ra, o‘g‘rilik 5 kun avval, ertalab sodir etilgan. Ahmadali bilan tanish bo‘lgan gumondorlardan biri uy egasining kelish va ketish vaqtidan yaxshi xabardor bo‘lgan.
Jinoyatchilar o‘g‘irlangan seyfni o‘zlari yashaydigan Yangiyo‘l shahriga olib ketgan va bolgarka yordamida uni buzishgan. Qo‘lga kiritilgan pul mablag‘lariga Sergeli tumanidagi avtomobil bozoridan Sobalt sotib olingan, yana bir qismini o‘z ehtiyojlari uchun sarflashgan.
Gumondorlar tomonidan avtosalondan sotib olingan avtomobil ko‘zdan kechirilganda yashil tusdagi hidli modda ham aniqlangan. Ratmir pullarning bir qismini qarindoshlariga tarqatgan, hujjatlarni va boshqa qimmatbaho buyumlarni o‘zining xonadoniga yashirgan.
Qo‘lga olinganlarning uyida olib borilgan tintuv vaqtida o‘g‘irlangan pullarning qolgan qismi, hujjatlar va jabrlanuvchiga tegishli boshqa buyumlar qo‘lga kiritildi. Tergov harakatlari olib borilmoqda.
Izoh (0)