JCh—2018. Daniya—Fransiya, Nigeriya—Argentina, Islandiya—Xorvatiya. Bugungi o‘yinlar anonsi

Bugun, 26-iyun sanasida futbol bo‘yicha Rossiyada bo‘lib o‘tayotgan Jahon Chempionatining “C” hamda “D” guruhida 3-tur o‘yinlari yakunlanadi. Har bir guruhda uchrashuvlar bir vaqtda boshlandi.

“C” guruhi so‘nggi turida Daniya Fransiya bilan, Avstraliya esa Peru bilan kurash olib boradi. Ikkala bellashuv ham 19:00 da boshlanadi.

Ayni vaqtda Fransiya 6 ochko bilan guruhda peshqadam. Daniyada esa 4 ochko mavjud. Avstraliya esa 1 ochko bilan uchinchi o‘rinda.

Peru esa ochkosiz va muddatidan avval pley-off yo‘llanmasidan umidini uzgan.

“D” guruhidan chiqish uchun bugun Nigeriya Messi yetakchiligidagi Argentinaga qarshi maydonga tushadi. Islandiya esa pley-off yo‘llanmasini 2-turdan keyinoq hal etgan Xorvatiya bilan bahs olib boradi. Ikkala bellashuv ham 23:00 da boshlanadi.

2-turdan keyin “D” guruhida Xorvatiya 6 ochko jamg‘arib muddatidan avval pley-off yo‘llanmasini tayin etgan. Ikkinchi o‘rin uchun birdaniga 3 ta jamoa kurashadi. Nigeriyada 3 ochko bo‘lsa, Islandiya va Argentinada 2-turdan keyin 1 ochkodan mavjud.

Ma’lumot uchun agarda jamoalar ochkolari bir xil bo‘lib qolsa, unda reglament bo‘yicha avvalo to‘plar nisbati, shunda ham tenglik bo‘lsa, unda qaysi jamoa ko‘proq gol urganiga e’tibor qaratiladi. Bu borada ham teng natija qayd etilsa, unda o‘zaro o‘yinlar inobatga olinadi. Agarda shunda ham ko‘rsatkichlar teng bo‘ladigan bo‘lsa, unda eng kam ogohlantirish olgan jamoa jadvalda yuqori o‘ringa ko‘tariladi. Barcha ko‘rsatkichlar teng keladigan bo‘lsa, unda FIFA “ko‘r qur’a” orqali g‘olibni aniqlab beradi.