Kattaqo‘rg‘onda Xitoy bilan hamkorlikda volfram, molibden va mis qazib olish bo‘yicha yangi loyiha amalga oshiriladi
O‘zbekiston Respublikasi Davlat geologiya va mineral resurslar qo‘mitasi taklifiga ko‘ra yurtimizga tashrif buyurgan Xitoyning “Sinyan” ilmiy-savdo kompaniyasi, og‘ir-mexanika sanoati yo‘nalishida faoliyat ko‘rsatuvchi CITIC kompaniyasi, Xenan provinsiyasidagi ko‘mir sanoati instituti, tog‘-kon metallurgiya sanoati yo‘nalishidagi Xenan Golun kompaniyasi rahbar va muhandislari Kattaqo‘rg‘on shahridagi Ingichka qo‘rg‘onidagi sobiq “Ingichka koni” aksiyadorlik jamiyati uchastkalarida volfram, molibden va mis qazib olish bo‘yicha loyihani amalga oshirish yuzasidan dastlabki o‘rganish ishlarini olib bordi, deb xabar berada “Daryo” muxbiri Farhod Norbo‘tayev.
Samarqand viloyati hokimligida Xitoyning Sinszyan provinsiyasidagi “Sinyan” ilmiy-savdo kompaniyasi prezidenti Sun Chjenszyun boshchiligidagi delegatsiya a’zolari bilan bo‘lib o‘tgan uchrashuvda ham delegatsiya rahbari Sun Chjenszyun o‘rganish xulosalari asosida Kattaqo‘rg‘on shahridagi Ingichka qo‘rg‘onida mavjud ikkita shaxtadan foydalanish va qo‘shimcha yangi kon shaxtalarini qurish imkoniyati mavjudligini ta’kidladi.
Xorijlik investorlar guruhi bilan o‘tkazilgan muloqotda, Ingichkada tog‘-kon metallurgiya sanoati yo‘nalishidagi loyihani amalga oshirish hamda qo‘rg‘onda kommunikatsiya tarmoqlari holatini yaxshilash, infratuzilma obyektlari qurish uchun Xitoy tomonidan 50-55 million dollar miqdorida to‘g‘ridan-to‘g‘ri investitsiya jalb qilinishi belgilab olindi. Bosqichma-bosqich amalga oshiriladigan loyiha natijasida 500 tadan 700 tagacha yangi ish o‘rni yaratiladi.
Ma’lumot uchun 2017-yilda ikki davlatlar o‘rtasidagi tovar ayirboshlash hajmi 5 milliard dollardan oshgan. Ayni paytda birgina Samarqand viloyatining o‘zida Xitoy kapitali ishtirokida 30 dan ortiq qo‘shma korxona faoliyat ko‘rsatmoqda. Mazkur korxonalar tomonidan qurilish materiallari, yengil sanoat, poyabzal, kimyo mahsulotlari, qadoqlash materiallari, motorollerlar va boshqa turdagi mahsulotlar ishlab chiqariladi.
