20-iyun kuni Termizda O‘zbekiston va Afg‘oniston davlat va xususiy sektorlari vakillari o‘rtasidagi muzokaralarning birinchi raundi bo‘lib o‘tdi. Bu haqda O‘zbekiston savdo-sanoat palatasining matbuot xizmati xabar berdi, deb yozadi “Gazeta.uz”.
Muzokaralar yakuni bo‘yicha har ikkala mamlakat savdo-sanoat palatalari ishtirokida afg‘on—o‘zbek ishbilarmonlar kengashini tashkil etish haqidagi memorandum imzolandi.
Afg‘oniston ishbilarmon doiralari delegatsiyasini qurilish, oziq-ovqat, farmatsevtika, neft-gaz, tog‘-kon, zargarlik sanoati, qishloq xo‘jaligi, logistika va savdo korxonalari ifoda etdi. Afg‘oniston prezidentining Markaziy Osiyo va MDH mamlakatlari bo‘yicha maxsus vakili Shakir Kargar va mamlakatning O‘zbekistondagi elchisi Sayyod Shahobiddin Timuriy ham delegatsiya tarkibiga kirdi.
O‘zbekiston tomonidan muloqotda tashqi savdo vaziri Jamshid Xo‘jayev, Savdo-sanoat palatasi raisi Adham Ikromov va Surxondaryo viloyati hokimi Erkinjon Turdimov ishtirok etdi.
Muzokaralar ishtirokchilari savdo sohasi, uchinchi mamlakatlarga eksport qilinuvchi yuklar tranziti va ularni tashish, qishloq xo‘jalik mahsulotlarini qayta ishlash, tayyor kiyim-kechak va qurilish materiallarini chiqarish bo‘yicha birgalikdagi ishlab chiqarishni tashkil etish kabi ikki tomonlama hamkorlikning istiqbolli yo‘nalishlariga urg‘u berdi.
Afg‘oniston tomoni O‘zbekiston bilan chegaradagi hamkorlik, jumladan, savdo sohasidagi hamkorlikni rivojlantirish, shuningdek, afg‘on biznesmenlari uchun viza jarayonlarini soddalashtirishga qiziqish bildirdi.
2017-yil yakunlariga ko‘ra, ikki mamlakat o‘rtasidagi tovar aylanmasi hajmi 15 foizga o‘sib, deyarli 599 million dollar, shu jumladan eksport 596,7 million dollar, import 2,2 million dollarni tashkil etgan. Joriy yilning besh oyi mobaynida o‘zaro savdo hajmi 286,7 million AQSh dollarini (14,5 foizga o‘sish) tashkil etdi. Mamlakatlar farmatsevtika, kimyo, avtomobil va to‘qimachilik mahsulotlarini yetkazib berish hajmini oshirishi mumkinligi ta’kidlandi.
Izoh (0)