JCh—2018. Meksika seriali davom etadi. Vela va Chicharitoning gollari Janubiy Koreyani deyarli uyiga ravona qildi (video)
Bugun 23-iyun sanasida futbol bo‘yicha Rossiya maydonlarida bo‘lib o‘tayotgan Jahon Chempionatining 2-tur o‘yinlari davom ettirilmoqda.
Bugunning o‘zida “F” guruhining 4 ta jamoasi 2-tur o‘yinida maydonga tushishi belgilangan edi.
Jumladan, 1-turda Germaniyani yutib sensatsiya qilgan Meksika, Osiyo qit’asi vakili Janubiy Koreyaga qarshi maydonga tushgan bellashuv yakuniga yetdi.
Uchrashuvda hisob 26-daqiqada Meksika termasi hujumchisi Karlos Vela tomonidan ochildi. Birinchi bo‘lim shu tarzda yakunlandi.
Ikkinchi bo‘limning 66-daqiqasida Irving Lozanoning uzatmasini Xavyer Ernandes “Chicharito” koreyslar darvozasiga joylab qo‘ydi. Hakam tomonidan qo‘shib berilgan daqiqalarda “Tottenhem” yetakchisi Son Xyon Min uzoqdan Gilyermo Ochoa darvozasini o‘qqa tutib, hisobni qisqartirishga erishdi. O‘yin esa 2:1 hisobida meksikaliklar foydasiga hal bo‘ldi.
Bu g‘alabadan so‘ng Meksika “F” guruhida 6 ochko jamg‘arib peshqadam bo‘lib turibdi.
Guruhning ikkinchi uchrashuvi bugun, 23:00 da Germaniya hamda Shvetsiya termalari o‘rtasida kechadi.
“Daryo” mazkur o‘yindan ham matnli onlayn translyatsiyani amalga oshirdi.
Jahon Chempionati
“F” guruhi, 2-tur bellashuvi
23-iyun, shanba
Janubiy Koreya—Meksika 1:2
Gollar: 0:1 – 26, penalti Vela, 0:2 – 66 Chicharito, 1:2 – 90 Son Xyon Min.Janubiy Koreya: Chjo Xen U, Kim Yen Gvon, Chjan Xen Su, Li Yen, Mun Son Min (Chjon U Yen, 77), Kim Min U (Xon Chxol, 84), Ki Son Yen, Chju Se Chjon (Li Sin U, 64), Li Chje Son, Xvan Xi Chxan, Son Xyon Min.
Meksika: Ochoa, Moreno, Salsedo, Alvares, Layyun, Errera, Galyardo, Vela (dos Santos, 77), Guardado (Markes, 68), Lozano (Korona, 71), Chicharito.
Ogohlantirishlar: Kim Yen Gvon (58), Li Yen (63), Li Sin U (72), Chjon U Yen (80).
