Vazirlar Mahkamasining “Umumiy o‘rta ta’lim muassasalari bitiruvchilarini rag‘batlantirishni yanada takomillashtirish chora-tadbirlari to‘g‘risida”gi qarori loyihasi Normativ huquqiy hujjatlar loyihalari muhokamasi portaliga joylashtirildi.
Loyihada 11 yillik umumiy o‘rta ta’limga o‘tilishi munosabati bilan umumiy o‘rta ta’lim muassasalari bitiruvchilari uchun oltin va kumush medallarni ta’sis etish taklifi kiritilmoqda.
Loyihaga ko‘ra, 11-sinf bitiruvchilari oltin medalni olish uchun:
9-sinfni bitirganlik to‘g‘risidagi a’lo darajali shahodatnoma;
10—11-sinflardagi barcha fanlar bo‘yicha oraliq, yakuniy nazoratlar hamda chorak va yil yakunlari bo‘yicha a’lo baholar;
Namunali xulqqa ega;
Jamoat ishlarida faol bo‘lishlari joiz.
Kumush medalni:
9-sinfni bitirganlik to‘g‘risidagi a’lo darajali shahodatnoma;
10-11-sinflardagi barcha fanlar bo‘yicha yil yakuniga ko‘ra a’lo baholar;
Namunali xulqqa ega;
Jamoat ishlarida faol bo‘lgan bitiruvchilar qo‘lga kirita oladi.
Oliy ta’lim muassasalariga kirishda medallar sohiblariga quyidagi imtiyozlarni taqdim etish taklif etilmoqda:
Oltin medal — kirish imtihonlarida to‘plagan umumiy ballga 50 foiz;
Kumush medal — kirish imtihonlarida to‘plagan umumiy ballga 30 foiz.
Oltin va kumush medallarga ega bo‘lgan o‘quvchilarga beriladigan imtiyoz muddatini 1 yilgacha qilib belgilash rejalashtirilgan.
Shuningdek, qaror bilan umumiy o‘rta ta’lim muassasalari bitiruvchilarini a’lo bilimi, namunali xulqi va faol jamoatchiligi uchun oltin va kumush medal bilan taqdirlash tartibi to‘g‘risidagi nizomni hamda oltin va kumush medallarning tavsifini tasdiqlash ko‘zda tutilgan.
Xalq ta’limi vazirligi oltin va kumush medallarning o‘quvchilarga xolislik va odillik tamoyillariga amal qilgan holda topshirilishini ta’minlaydi.
Bundan tashqari, vazirlik har yili 10 iyunga qadar o‘zining veb-saytida medallar bilan taqdirlangan bitiruvchilar va ularga berilgan shahodatnomalar to‘g‘risidagi ma’lumotlarni joylashtiradi.
Izoh (0)