15-iyundan boshlab O‘zbekiston Milliy aviakompaniyasi Islom Karimov nomidagi “Toshkent” aeroportiga xalqaro avialiniyalar orqali uchib keluvchi yo‘lovchilar uchun yangi terminalni ishga tushiradi. Bu haqda Spot xabar berdi.
Yangi terminaldan zamonaviy texnologiya qurilmalari, Wi-Fi tizimi, qizil va yashil yo‘laklar, yuklarga mo‘jallangan to‘rtta lenta, 24 ta pasport nazorati punkti, viza bilan ta’minlash punkti, ikkita valyuta ayirboshlash shoxobchasi, ikkita dutf free do‘koni va ikkita qahvaxona o‘rin olgan.
Soatiga 1000 nafar yo‘lovchiga xizmat ko‘rsatishga mo‘ljallangan yangi binoning ishga tushirilishi yo‘lovchilarga xizmat ko‘rsatishni yaxshilash va mamlakatga kirish uchun kerakli jarayonlarni tezlashtirishga yordam beradi.
Pasport nazoratidan o‘tish uchun sarflanadigan vaqt 7—9 daqiqadan 2 daqiqaga qadar qisqaradi. Shu orqali aeroportdagi rasmiy jarayonlarning barchasini 20—30 daqiqada tugatish mumkin bo‘ladi.
Qo‘shimcha qo‘nish zonasi sobiq Mahalliy havo liniyalari binosining bazasida O‘zbekiston Prezidentining qaroriga asosan tashkil etilgan. Umumiy maydoni 9802,36 metr kvadratga teng bino “O‘zbekiston havo yo‘llari” MAK hisobidan rekonstruksiya qilindi.
Izoh (0)