Samarqandda Ozarbayjon madaniyati haftaligi boshlandi

Samarqandda Ozarbayjon madaniyati haftaligi boshlandi, deb yozmoqda Sputnik.

Haftalik Ozarbayjonning 100 yilligi va 15-iyun — Millat ozodligi kuniga bag‘ishlangan. Tadbir O‘zbekistondagi Gaydar Aliyev nomidagi Ozarbayjon madaniyati markazi bilan hamkorlikda tashkil etildi.

Ozarbayjon madaniyati haftaligining ochilishi Hamid Olimjon nomidagi musiqiy drama teatrida bo‘lib o‘tdi.

O‘zbekistondagi Gaydar Aliyev nomidagi Ozarbayjon madaniyati markazi rahbari Samir Abbosov Ozarbayjonda 2018-yil Ozarbayjon demokratik respublikasi yili deb e’lon qilinganini ma’lum qildi. Abbosov haftalik doirasida Samarqandda milliy musiqa konserti, modalar namoyishi, film taqdimotlari, fotoko‘rgazma va kitoblar ko‘rgazmasi tashkil etilishini aytib o‘tdi. Shuningdek, Abbosov Samarqand kutubxonalariga Baku va Toshkentda ozarbayjon va o‘zbek tillarida nashr qilingan kitoblar taqdim qilinishini ta’kidladi.

Tantanali marosimda “Asl”, “O‘zbegim yoshlari” musiqa jamoalari o‘zbek va ozarbayjon musiqasini ijro qildi. Ozarbayjon madaniyati markazining xoreografiya guruhi milliy raqslarni taqdim qildi. Kitoblar ko‘rgazmasi va fotoko‘rgazma tashkil etildi. Milliy kiyimlar kolleksiyasi namoyish etildi.