Surxondaryo viloyati Uzun tumanidagi Oqmachit mahallasida yashovchi fuqaro 32 yoshida mo‘may pul topishning turli yo‘llarini xayolidan o‘tkazdi, deb yozadi O‘zA. Nihoyat qabristonlarga o‘rnatilgan ehson qutilaridagi pullarni o‘marib, turmush kechirmoqchi bo‘ldi.
Shu maqsadda o‘tgan yil may oyida Toshkent shahri Chilonzor tumanining Bo‘ta buva qabristonidagi ehson qutilariga tashlangan pullarni o‘g‘irlab, jinoiy javobgarlikdan qochdi. Shundan so‘ng jinoyat ishlari bo‘yicha Uzun tumani sudi tomonidan unga nisbatan qidiruv e’lon qilindi.
Buni qarangki, bir yildan buyon qidiruvda bo‘lgan fuqaro Surxondaryo viloyati ichki ishlar boshqarmasi, Milliy gvardiya va boshqa davlat, jamoat tashkilotlari hamkorligida tezkor vaziyatni barqarorlashtirish, jinoyat va huquqbuzarliklarning barvaqt oldini olish, aholining osoyishta, farovon turmushini ta’minlash maqsadida Jarqo‘rg‘on tumanida o‘tkazilayotgan maxsus tadbir chog‘ida tumshug‘idan ilindi.
Izoh (0)