Buxoroda o‘g‘lini harbiy qismga ishga joylashtirish niyatida yurgan ayoldan 1500 dollar olgan “folbin” va uning hamtovog‘i ushlandi. Bu haqda UzNews xabar berdi.

Foto: Buxoro viloyat IIB

Fuqaro D.Kamolovaning arizasi asosida olib borilgan tergovga qadar tekshiruvlar davomida aniqlanishicha, G‘ijduvon tumanida yashovchi Nurillo Qudratov hamda Bozor Ergashev oldindan o‘zaro jinoiy til biriktirib, D.Kamolovani aldash va ishonchini suiste’mol qilish yo‘li bilan uning mulkini qo‘lga kiritishni ko‘zlab, o‘g‘li F.Bo‘ronovni Qarshi shahridagi 59-sonli harbiy qismga ishga joylashtirishni va’da qilib, 1500 dollarni talab qilib olib, firibgarlik jinoyatini sodir qilgan.

Ushbu jinoyatning kelib chiqish sabablari va bunga sharoit yaratib bergan omillar o‘rganilganda, Nurillo Qudratov uzoq yillardan buyon folbinlik va tabiblik bilan shug‘ullanib kelayotganligi, o‘zining va oilasidagi muammolarini duo o‘qitish, fol ko‘rsatish orqali hal etishga mukkasidan ketgan D.Kamolova esa uning uyiga tez-tez borib, duo o‘qitib kelishga odatlanganligi ma’lum bo‘ldi.

Ayolning barcha muammolaridan xabardor bo‘lgan, sodda, ishonuvchan ekanligidan foydalangan Nurillo folbin uni “hojatbaror” Bozor Ergashev bilan tanishtiradi. Go‘yo o‘g‘lini ishga joylashtira oladigan “amaldor”ni topib bergandek, uni aldab, pora berishida dalolatchilik qiladi. 1500 dollarni qo‘lga kiritgan Bozor Ergashev esa salkam 8 oy ayolni laqillatib, o‘g‘lini ishga joylashtirmasdan, olgan pullarini ham qaytarib bermay, ushbu pullarni o‘zining ehtiyojlari uchun sarflab yuboradi.

Mazkur holat yuzasidan Qudratov Nurillo Hikmatullayevich hamda Ergashev Bozor Ramazonovichlarga nisbatan O‘zbekiston Respublikasi Jinoyat Kodeksining 168-moddasi 2-qismi va 28-211 moddasi 1-qismi bilan jinoyat ishi qo‘zg‘atilib, Shofirkon tuman prokuraturasi tomonidan tergov harakatlari olib borilmoqda.