Nazarboyev ShHT davlatlariga o‘zaro hisob-kitoblarni milliy valyutada amalga oshirishni taklif qildi

Qozog‘iston prezidenti Nursulton Nazarboyev Shanxay hamkorlik tashkilotining a’zo mamlakatlariga o‘zaro hisob-kitobda milliy valyutadan foydalanish va shu orqali iqtisodiy xavfsizlikni ta’minlashni taklif qildi, deb xabar bermoqda “Kommersant.uz”.

“Bugun dunyoda xalqaro valyuta bozorining diversifikatsiyasi, valyuta qaramligi xavflarini kamaytirish va kriptovalyutalarning paydo bo‘lishi haqida ko‘p gapirilmoqda. Shuning uchun mamlakatlarimiz iqtisodiy xavfsizligini ta’minlash yo‘nalishlaridan biri sifatida ShHT mamlakatlariga o‘zaro hisob-kitobda milliy valyutaga o‘tishni taklif qilaman”, — deya Nazarboyev 10-iyun, yakshanba kuni ShHTga a’zo davlatlarning 18-yig‘ilishida taklif qildi.

Qozog‘iston prezidentining so‘zlariga qaraganda, Sindaodagi sammitdan keyin ShHT mamlakatlari markaziy banklari vakillari yig‘ilib, “yo‘l xaritasi”ni ishlab chiqishni boshlashlari mumkin.

“Mamlakatlarimiz o‘rtasidagi tijorat-investitsion loyihalarni ikki taraflama emas, ko‘p taraflama bo‘lishiga erishishimiz muhim. Biz tashkilot doirasidagi loyihalarni hamkorlikda moliyalashtirish va texnologik resurslarni mobilizatsiya (harakatga keltirish) qilishning tarafdorimiz, — deydi Nursulton Nazarboyev.