Xitoy Shimoliy Koreya yetakchisi Kim Chen In Singapurga AQSh prezidenti Donald Tramp bilan uchrashish uchun otlangan vaqtda, uning samolyotiga hamrohlik qilish uchun qiruvchi samolyotni jalb qilishi mumkin. Bu haqda South China Morning Post Janubiy Koreya harbiy-havo kuchlaridagi manbasiga tayanib xabar berdi.
Manbaga ko‘ra, agar Xitoy o‘z hududida eskort taqdim etsa, bu AQSh va Janubiy Koreya uchun Shimoliy Koreya hukumatining kuchli tarzda qo‘llab-quvvatlanishi haqidagi bevosita signal bo‘lib xizmat qiladi. “Davlat rahbariga qiruvchilarning hamrohlik qilishi — havo kuchlari ta’minlashi mumkin bo‘lgan eng oliy xavfsizlik protokollaridan biri”, — dedi u.
Gazeta yozishicha, KXDR yetakchisi Singapurga boradigan yo‘nalish noma’lum. Ammo ekspertlar taxmin qilishicha, Kim Chen In sammitga aynan Xitoy havo hududi orqali parvoz qiladi, chunki bu yo‘lda u uchun maksimal xavfsizlikni ta’minlaydi. Ayni vaqtda ta’kidlanishicha, Singapurda uning xavfsizligi uchun taxminan 34 nafar tansoqchi mas’ul bo‘ladi.
Avvalroq OAVlar Kim Chen In uni Singapurga ketishda yoki sammit chog‘ida o‘ldirishlaridan xavfsirayotgani haqida xabar bergan edi.
AQSh va Shimoliy Koreya yetakchilarining uchrashuvi 12-iyun kuni Singapurda bo‘lib o‘tadi.
Izoh (0)