Xitoyda akustik hujumga uchragan deb taxmin qilinayotgan amerikalik diplomatlar tibbiy tekshiruvdan o‘tish uchun AQShga qaytarildi. Bu haqda AQSh davlat departamenti rasmiy vakili Xizer Noyertga tayanib, “RIA Novosti” xabar bermoqda.
“AQSh hukumatining xodimlari va ularning oilalari xavfsizligini ta’minlash asosiy vazifalarimizdan biri hisoblanadi. Davlat departamenti diplomatlardan birining o‘zini yomon his qilayotganidan xabar topishi bilan Guanchjouga ularni tekshiruvdan o‘tkazish uchun tibbiy yordam guruhini yubordi. Xuddi shu kabi shikoyatlar bilan Gavanadagi xodimlarimiz ham murojaat qilgan edi”, — deydi davlat departamenti rasmiy vakili Xizer Noyert.
AQSh davlat departamenti Guanchjoudagi konsullikning ikki xodimini evakuatsiya qilgan. Avvalroq amerikalik diplomatlardan biri noodatiy tovushlarni eshitayotgani va bosimni his qilayotganini ma’lum qilgan. AQSh diplomatik missiya vakillarini darhol tekshiruvdan o‘tkazish uchun tibbiyot xodimlarini yuborgan. Davlat departamenti Xitoy hukumatiga tergov ishlarida yordam berishni so‘rab murojaat qilgan. Biroq Xitoy hukumati hech qanday akustik hujum belgilari aniqlanmaganini ma’lum qilgan.
Noyertning so‘zlariga qaraganda, sog‘lig‘idan shikoyati bor barcha xodimlar tibbiy tekshiruvdan o‘tkazilmoqda. Diplomatlarning bir qismi keyingi tekshiruvlardan o‘tish uchun AQShga jo‘nab ketgan. “Amerikalik malakali shifokorlar diplomatlarimizni to‘liq tibbiy tekshiruvdan o‘tkazmoqda, shikoyatlar sabablari avvalgi holatlar bilan solishtiriladi”, — deydi Noyert.
Eslatib o‘tamiz, avvalroq davlat departamenti AQShning Kubadagi elchixonasi xodimlaridan 16 nafari “akustik qurol”dan jabrlanganini ma’lum qilgan. Shuningdek, amerikalik diplomatlar Gavanadagi mehmonxonalarda ham akustik hujumlarga duch kelgani xabar qilingan.
Izoh (0)