Samarqand viloyatida sanoat daraxtlarini yetishtirish boshlandi

Samarqand viloyatida 25 gektar hududga pavlovniya daraxtlari ekiladi, deb xabar beradi “Novosti Uzbekistana”.

Pavlovniya daraxtining yog‘ochi namlikni yaxshi yutuvchi va deformatsiyaga bardoshli hisoblanadi. O‘ziga xos kimyoviy tarkibi sabab daraxt har xil kemiruvchi va termitlarga chidamli. Pavlovniyalardan sanoatda qayiqlar, syorfing doskalari, chang‘ilar, snoubordlar, bolalar o‘yinchoqlari hamda musiqa anjomlarini yasashda foydalaniladi.

Dastlabki ko‘chatlar joriy yilning kuzida ekiladi. Keyingi yildan boshlab ikki barobar ko‘proq hududga shu turdagi ko‘chatlarni ekish rejalashtirilmoqda. Bundan tashqari hozirda Samarqand viloyatida 44,5 gektar yerga tez o‘suvchi teraklar ekilgan bo‘lib, ikki yil ichida teraklar uchun 150 gektar yangi plantatsiyalar ajratiladi.