Ichki ishlar vazirligi madaniyat saroyida bo‘lib o‘tgan tantanali marosimda Ichki ishlar vaziri va Toshkent shahar IIBB boshlig‘ining maxsus unvonlarni topshirish to‘g‘risidagi buyruqlari o‘qib eshittirildi. Bu haqda Toshkent shahar IIBB matbuot xizmati xabar berdi.
Ichki ishlar vazirining buyrug‘iga ko‘ra, 200 dan ziyod xodimlarga podpolkovnik, yana 60 nafariga leytenant unvonlari berildi. Toshkent shahar IIBB boshlig‘i buyrug‘i bilan 70 dan oshiq xodimlar navbatdagi mayor, kapitan va katta leytenant unvonlariga ega bo‘ldilar.
Ofitserlarga unvon pogonlarini IIBB boshlig‘i general-mayor Rustam Jo‘rayev topshirdi. Ularni xizmat faoliyatlaridagi ushbu muhim voqea bilan tabriklar ekan, mas’uliyatli xizmatlarida, xususan jamoat tartibini saqlash va aholi xavfsizligini ta’minlashda omadlar tiladi.
Tadbir davomida Toshkent shahar IIBB markaziy apparati shaxsiy tarkibi uchun ma’naviyat soati ham tashkil etildi. “Rahbar xodimlarning psixologiyasida obod-ahloq tushunchasi” mavzusiga bag‘ishlangan ushbu dars soatida Toshkent davlat pedagogika universiteti qoshidagi ilmiy-o‘quv markazi rahbari, psixologiya fanlari doktori, professor G‘ayrat Shoumarov ma’ruza qildi.
Shu kuni Toshkent shahar IIBB Kasaba uyushmasi qo‘mitasining raisi lavozimiga ochiq ovoz berish yo‘li bilan Kadrlar boshqarmasi bo‘limi boshlig‘i podpolkovnik Z.Xayriddinov saylandi.
Izoh (0)