Namanganda Bobur nomli madaniyat va istirohat bog‘ida o‘tkazilgan 58-an’anaviy “Gul bayrami” g‘oliblari va sovrindorlarini taqdirlash marosimi bo‘lib o‘tdi. Bu haqda “Daryo” muxbiri xabar bermoqda.

Foto: Namangan shahar hokimligi axborot xizmati

Bu yilgi bayram ilk bor bir hafta davom etdi. Unda nafaqat namanganliklar va viloyat mehmonlari, balki 10 dan ortiq chet davlatdan kelgan martabali vakillar va sayyohlar ham ishtirok etdi.

Foto: Namangan shahar hokimligi axborot xizmati

“Gul bayrami”ning oliy o‘rin sohiblari uchun ikkita Spark ajratildi. Avtomobillar gulchi Mirzohid Xolmirzayev hamda “Namangan hududiy elektr tarmoqlari korxonasi” jamoasiga nasib etdi.

Foto: Namangan shahar hokimligi axborot xizmati

Birinchi o‘rinni egallagan gulchi Azizbek Mamajonov va viloyat kasaba uyushmalari tashkilotlari birlashmasi, ikkinchi o‘rinda qayd etilgan Sadriddin Qodirov va Namangan shahar xalq ta’limi bo‘limi, uchinchi o‘rinni band qilgan Jo‘raxon Mo‘minov va Namangan muhandislik-qurilish instituti jamoalari diplom va esdalik sovg‘alari bilan taqdirlandi.

Foto: Namangan shahar hokimligi axborot xizmati

Taqdirlash marosimida O‘zbekiston xalq artistlari Abduhoshim Ismoilov va Zulayho Boyxonova, O‘zbekistonda xizmat ko‘rsatgan artistlar Mehri Abdullayeva, Yahyobek Mo‘minov, Samandar Xamroqulov, “Nihol” davlat mukofoti sovrindorlari Malika Egamberdiyeva, Gulasal Abdullayeva, xonandalar Otabek Muhammadzohid, Munisa Rizayeva, Qilichbek Madaliyev kuy-qo‘shiqlari bilan ishtirok etdi.

Foto: Namangan shahar hokimligi axborot xizmati

Bobur nomli bog‘dagi gul sayllari davom etmoqda.

Foto: Namangan shahar hokimligi axborot xizmati