O‘zbekiston futbol assotsiatsiyasi JCh-2018 uchun FIFA tomonidan ajratilgan 12 ta chiptani O‘zbekiston Pepsi Superligasining 12 ta jamoasiga bittadan taqdim etadi, deb yozadi tashkilot matbuot xizmati.
FIFA hamda JCh-2018 mezboni Rossiya chiptalarini adolatli sotish mexanizmini ishlab chiqqan bo‘lib, unga ko‘ra bu jarayon 4 ta bosqichda amalga oshirilishi kerak edi. Shundan 3 ta bosqich savdolaori allaqachon yakuniga yetib ulgurgan. To‘rtinchi bosqichda esa faqatgina omadi chopgan muxlislargagina chiptalar nasib qilishi mumkin.
O‘FA Xalqaro futbol uyushmasiga maktub bilan chiqib, o‘zbekistonlik muxlislar uchun chipta ajratishni so‘radi. Bu borada talab katta bo‘lgani uchun, FIFA o‘zida bor bo‘lgan sanoqli chiptalarnigina sotishi mumkin edi, deyiladi xabarda.
FIFA Angliya hamda Belgiya termalari o‘rtasidagi uchrashuv uchun 10 dona chipta taqdim etgan. Uchrashuv 28-iyun kuni Kaliningrad shahrida bo‘lib o‘tadi.
Yana 2 ta chipta esa Serbiya — Braziliya o‘yiniga bo‘ladi. Bu o‘yin 27-iyun kuni Moskva shahrida bo‘lib o‘tadi.
Rejaga ko‘ra O‘zbekiston Pepsi Superligasining 12 ta klubiga 1 tadan chipta beriladi. Klublar esa chiptani o‘zining eng faol muxlisiga taqdim etadi. Yoki bo‘lmasa, o‘sha chipta lotereya orqali o‘z egasini topadi. Buni klublarning o‘zi hal qiladi, deyiladi O‘FA xabarida.
Ta’kidlanishicha, O‘zbekiston milliy terma jamoasi Qatar mezbonlik qiladigan JCh—2022 da o‘ynash huquqini qo‘lga kiritsa, o‘zbekistonlik jurnalistlarga ham, futbol muxlislariga ham katta miqdorda kvotalar beriladi va bu borada muammolar yuzaga kelmaydi.
Izoh (0)