Namangan viloyatining To‘raqo‘rg‘on tumanida yashovchi tadbirkor Jobirxon Kamoliddinov bundan bir yil avval nohaq qamalgandi. Yaqinda oqlanib, jazodan ozod etildi. Ishbilarmon tomonidan taklif etilayotgan loyiha hukumat rahbarining e’tiborini tortdi. Bu haqda O‘zA xabar berdi.
O‘zbekiston Respublikasi Bosh vaziri Abdulla Aripov Prezidentning joriy yil 29-martdagi “Obod qishloq” dasturi to‘g‘risida”gi farmoni va “Obod qishloq” dasturini 2018-yilda amalga oshirish bo‘yicha qo‘shimcha chora-tadbirlar to‘g‘risida”gi qarori ijrosini ta’minlash bo‘yicha qilinayotgan ishlar bilan tanishish uchun Namangan viloyatining To‘raqo‘rg‘on tumaniga bordi.
Hukumat rahbari vazirlik va idoralar, tijorat banklari rahbarlari, mahalliy hokimlik mutasaddilari hamrohligida “Oqtosh” mahallasida kichik biznes va tadbirkorlik subyektlari tomonidan yangi ishlab chiqarish obyektlarini barpo etish, yangi ish o‘rinlarini yaratish, hududda sanoat salohiyatini rivojlantirishga qaratilgan loyihalar bilan yaqindan tanishdi.
Ayniqsa, Namangan shahridagi Aisha Home Textile qo‘shma korxonasi ta’sischiligida J.Kamoliddinov rahbarligidagi “Oqtosh tekstil” mas’uliyati cheklangan jamiyati tomonidan taklif etilayotgan Oqtosh shaharchasida paxta tolasidan yigirilgan kalava ip ishlab chiqarish, to‘quv va tikuv fabrikasi tashkil etish loyihasi Bosh vazirda katta qiziqish uyg‘otdi.
Bu loyiha davlat rahbarining 2016-yil 21-dekabrdagi qarori bilan tasdiqlangan “2017–2019-yillarda to‘qimachilik va tikuv-trikotaj sanoatini yanada rivojlantirish dasturi” asosida hamda tadbirkorlik subyektlariga yaratib berilayotgan imtiyoz va imkoniyatlardan to‘laqonli foydalangan holda amaliyotga tatbiq etiladi.
Loyiha rahbari, tadbirkor Jobirxon Kamoliddinovning qayd etishicha, umumiy yer maydon 9,3 gektarni tashkil etadigan obyektda 41 million AQSh dollari miqdoridagi loyiha ishlari amalga oshiriladi. Shundan 10 million dollari miqdoridagi bank krediti asosida bajarilsa, 31 million dollar tadbirkor mablag‘i evaziga bajariladi. Shveysariya, Yaponiya, Italiya, Xitoy, Italiya, Fransiya, Turkiya davlatlarining yetakchi kompaniyalarida ishlab chiqarilgan eng so‘nggi, zamonaviy asbob-uskunalar o‘rnatiladi.
Korxonada kelgusida pardalik, yotoqxona jamlamasi, kostyum va shim uchun matolar, bo‘yalgan kalava ip, xom kalava ip kabi mahsulotlar tayyorlanishi ko‘zda tutilgan. Korxonaning dastlabki bosqichi 2019-yilning ikkinchi choragida ishga tushiriladi. Ushbu istiqbolli loyiha joriy etilishi natijasida 800 ta yangi ish o‘rni yaratiladi.
Ma’lumot o‘rnida, loyiha tashabbuskori sanalgan Aisha Home Textile qo‘shma korxonasi 2013-yili tashkil etilgan. Korxona tomonidan respublika budjetiga o‘z vaqtida soliq, bojxona va boshqa majburiy to‘lovlar o‘z vaqtida amalga oshirib kelinishi natijasida 2015-yil yakuniga ko‘ra, respublika Davlat soliq qo‘mitasining “Namunali soliq to‘lovchi” faxriy yorlig‘i bilan taqdirlangan. 2016-yili o‘tkazilgan O‘zbekiston Respublikasi Prezidenti sovrini uchun o‘tkazilgan “Tashabbus” ko‘rik-tanlovi yakuniy bosqichida “Eng yaxshi tadbirkor” nominatsiyasida g‘olib chiqib, Spark avtomobili bilan taqdirlangan.
Taqdimot yakunida Abdulla Aripov paxta tolasidan yigirilgan kalava ip ishlab chiqarish, to‘quv va tikuv fabrikasi tashkil etish loyihasini izchillik bilan amalga oshirish va uni moliyaviy qo‘llab-quvvatlash yuzasidan Namangan viloyati hokimi Xayrullo Bozorov hamda “Asaka bank” respublika boshqaruvi raisiga tegishli topshiriqlar berdi.
Izoh (0)