Moskva davlat universitetining Toshkentdagi filiali talabalari Shavkat Mirziyoyevga shartnoma puli borasida murojaat yo‘lladi

Lomonosov nomidagi Moskva davlat universitetining Toshkentdagi filiali talabalari O‘zbekiston Prezidentidan ta’lim uchun shartnoma to‘lovlar borasida yordam so‘rab jamoaviy murojaat yo‘lladi, deb xabar beradi Sputnik.

“2017-yilning sentabriga qadar bizning universitetda yillik shartnoma to‘lovi 4 ming dollar edi, to‘lov Markaziy bank kursi bo‘yicha milliy valyutada, belgilangan kunda amalga oshirilardi. So‘nggi marta ushbu summa 16 million 840 ming so‘mni tashkil etgan. Shartonama puli dollar kursiga qarab har hafta oshib bordi. Buning natijasida birinchi kursda 10 million so‘m to‘lagan talabalar, 3-kursga borib yiliga 16 million so‘m to‘laydigan bo‘ldi. Biroq Prezidentning 5177 farmoni chiqqanidan so‘ng, shartnoma pulini xorijiy valyutada hisoblashda qiyinchilik tug‘ilgani sabab Markaziy bankning 2017-yil 4-sentabrdagi kursi bo‘yicha (1 dollar = 4210 so‘m) qayd etildi va 2017—2018-o‘quv yili uchun 16 million 840 ming so‘mni tashkil etdi”, — deyiladi talabalar murojaatida.

2017-yilning 5-sentabridan boshlab rasmiy kursning deyarli ikki barobarga o‘zgarganidan so‘ng, universitet rahbariyati talabalarga shartnoma to‘lovlari oshirilganini, dastlabki hisob-kitoblarga ko‘ra, bu kamida 26 million so‘m bo‘lishini ma’lum qilgan.

“Ushbu mablag‘larni to‘lay olmagan talabalar o‘qishni yarim yo‘lda qoldirishga majbur bo‘ladilar va ushbu qaror orqali ular o‘z kelajagini barbod qilishlari mumkin”, — deyiladi faollar tomonidan yo‘llangan murojaatda.

Mazkur murojaatnomaga jami 133 kishi imzo chekkan va O‘zbekiston Oliy ta’lim vazirligiga yuborilgan.