15—19-may kunlari Moskva oliy umumqo‘shin qo‘mondonlik bilim yurtida MDHga a’zo davlatlar Mudofaa vazirliklarining kursantlari o‘rtasida “Harbiy-kasbiy tayyorgarlik” bo‘yicha IV Xalqaro olimpiadaning navbatdagi bahslari bo‘lib o‘tdi. Unda O‘zbekiston Mudofaa vazirligi kursantlari birinchi marta ishtirok etishiga qaramay, ikkinchi o‘rinni qo‘lga kiritdi. Bu haqda vazirlik matbuot xizmati xabar berdi.
Chirchiq oliy tank qo‘mondonlik-muhandislik bilim yurti taktika kafedrasi boshlig‘i podpolkovnik G‘ani To‘rayev va bilim yurtining otish tayyorgarligi kafedrasi katta o‘qituvchisi podpolkovnik Mirzohid Hasanov boshchiligida kursantlar MDHga a’zo mamlakatlarning oliy harbiy ta’lim muassasalaridan ishtirok etgan 300 nafardan ziyod eng sara kursantlari o‘rtasida taktik va taktik maxsus, otish, harbiy-sport tayyorgarliklari hamda ijtimoiy missiya kabi shartlarida bellashdi. Olimpiadaning ushbu yo‘nalishida to‘rtta shartdan o‘zbekistonlik kursantlar uchtasida ikkinchi va bittasida to‘rtinchi o‘rinni egallab, umumjamoa hisobida Moskva oliy umumqo‘shin qo‘mondonlik bilim yurtidan keyingi pog‘onani zabt etdi. Uchinchi o‘rinni esa Qozog‘iston Quruqlikdagi qo‘shinlar harbiy instituti jamoasi egalladi.
G‘olib va sovrindorlar kubok, medal va esdalik sovg‘alari bilan taqdirlandi.
O‘zbekiston sharafini xalqaro musobaqada munosib himoya qilgan harbiy xizmatchilar Islom Karimov nomidagi Toshkent xalqaro aeroportida munosib kutib olindi.
MDHga a’zo mamlakatlarning oliy harbiy ta’lim muassasalari kursantlari o‘rtasidagi IV Xalqaro olimpiadada ilk bor ishtirok etgan O‘zbekiston Mudofaa vazirligi vakillari 5 ta yo‘nalishi bo‘yicha bittadan ikkinchi va to‘rtinchi, uchtasida esa uchinchi o‘rinlarni qo‘lga kiritdi.
Izoh (0)