Checheniston rahbari Ramzan Qodirov respublikada IShID tashkilotining jangarilari yo‘qligini, cherkovga hujum uchun boshqa shaxslar javobgarligini aytdi. Bu haqda u Telegram-kanalida yozdi.
“Chechenistonda hech qanaqa ‘Iblis davlati’ va uning emissarlari bo‘lmagan va bo‘lmaydi ham. Arxangel Mixail cherkovidagi voqealar ortida turganlar qonunda ko‘zda tutilgan eng shafqatsiz jazoga tortiladi. Bunga hech kim shubha qilmasa ham bo‘ladi”, — dedi u.
Checheniston rahbari fikricha, “allaqanday chet el saytlari” har qanday hujum uchun terrorchilar javobgarligi haqida xabar beradi. Ular shu tariqa IShID har narsaga qodir tashkilot ekanligini butun dunyoga singdirmoqchi bo‘ladi.
“Uning tarafdorlari bunday shafqatsiz aksiya haqida buyruq bermagan bo‘lardi demoqchi emasman, ammo bu holatda buyruq qayerdan kelib tushgani, shamol qaysi tomondan esayotgani haqida tezkor axborot bor”, — deya qo‘shib qo‘ydi Qodirov.
19-may kuni Qodirov Checheniston poytaxti Grozniyda Arxangel Mixail pravoslav cherkovi tashrifchilarini garovga olishga uringan to‘rt nafar jangari yo‘q qilinganini ma’lum qilgan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)