Toshkent viloyatining ma’muriy markazi Nurafshon shahri maktablari o‘rtasida 19-may kuni “Zakovat” turniri bo‘lib o‘tdi. Bu haqda “Zakovat” intellektual klubi a’zosi Xushnud Xudoyberdiyev “Daryo”ga ma’lum qildi.
Musobaqa Nurafshon shahar prokurori Jahongir Muratov tashabbusi asosida shahar xalq ta’limi bo‘limi bilan hamkorlikda tashkil etilgan va g‘olib jamoaga maxsus kubok topshirilgan.
Intellektual musobaqada Nurafshon shahrining 13 ta maktabidan jami 26 ta jamoa — har bir maktabdan ikkitadan jamoa ishtirok etgan.
Jamoalarga 24 ta savol berildi va ular o‘z javoblarini maxsus qog‘oz blanklarga yozgan holda taqdim etdi. Har bir to‘g‘ri javobga 1 ochkodan berildi. Yakunda eng ko‘p to‘g‘ri javob bergan jamoa g‘olib bo‘ldi.
Umumiy natijalarga ko‘ra, 13-maktabning “Qalqon” jamoasi 12 ochko bilan 1-o‘rinni, 62-maktabning “Respect” jamoasi 11 ochko bilan 2-o‘rinni, 9-maktabning “Nur” jamoasi esa 9 ochko bilan 3-o‘rinni qo‘lga kiritgan.
Tadbir yakunida bu kabi turnirlar doimiy ravishda o‘tkazilishi va ko‘chma kubok tashkil qilinishi haqida ma’lum qilingan.
Izoh (0)