O‘zbekistonlik bir guruh jurnalistlar Markaziy Osiyo mintaqaviy ekologiya markazi (MOMEM) Yevropa Ittifoqi moliyaviy ko‘magida amalga oshirayotgan UzWaterAware loyihasi doirasida Qoraqalpog‘istonda bo‘lib qaytdi. Mediatur ishtirokchilari orasida “Daryo” muxbiri Azizbek Abduvaliyev ham bor edi.
10-may kuni mediaturning 40 nafarga yaqin qatnashchisi Toshkent xalqaro aeroportiga yig‘ildik. Safimizdan axborot agentliklari, internet-nashrlar, gazetalar, radio va televideniye vakillaridan tashqari loyiha tashkilotchilari — Yevropa Ittifoqi va MOMEM, loyihaning milliy hamkorlari — O‘zbekiston Suv xo‘jaligi vazirligi va “O‘zgidromet” xodimlari ham o‘rin oldi.
Soat 17:30 da Toshkentdan Nukusga yo‘l olgan samolyot bortida illyuminator oldida joylashib olib to manzilga yetguncha atrofni kuzatib bordim. Obod, ko‘rkam hududlar asta-sekin chekinib, o‘rnini qaqroq yerlar, sahrolarga bo‘shatib bera boshladi. Bu ko‘rinish to Nukusga yetgunimizcha o‘zgarmadi.
Qoraqalpog‘iston poytaxti katta qurilish maydonini eslatadi. Buni samolyotimiz Nukus aeroportiga qo‘nganidayoq payqadik. Prezident Shavkat Mirziyoyev 2017-yil yanvarida Qoraqalpog‘istonga tashrifi chog‘ida aeroport, unga kirish va chiqish yo‘llarini ta’mirlash bo‘yicha topshiriqlar bergandi. Havo qo‘nalg‘asida o‘tgan yil aprel oyida boshlangan ta’mirlash ishlari yakuniga yetmoqda. Aeroport shu oy oxirlarida foydalanishga topshiriladi.
Bizni “Jibek joli” mehmonxonasiga joylashtirishdi. Nukusda yigirmaga yaqin mehmonxona bo‘lib, jurnalistlarni qarshi olgani ular orasida peshqadami sanaladi. Unda qoraqalpoq madaniyati, urf-odatlarining bir bo‘lagini sezasiz. Baraka topkurlar ichkariga o‘tovdan tortib aravagacha olib kirib qo‘yishibdi. Xonadagi yostiqlargacha milliy ornamentda ishlangan.
Kechki taomdan so‘ng Nukusga qatnayverib ko‘zi pishib ketgan hamkasbim Nargis Qosimova bilan tungi poytaxtni kezdik. Shaharda 300 mingdan ortiq aholi yashaydi. Ko‘rkam, tinch va osuda. Katta kentlarga xos gavjumlik, mashinalar tirbandligini sezmaysiz. Savitskiy muzeyiga kirishga imkon qilolmagan bo‘lsak-da, jillaqursa yaqinlashganimizdan faxr tuydik. Uning yaqinda qurib, foydalanishga topshirilgan ikkinchi korpusi bilan tanishdik.
Qoraqalpog‘iston axborot agentligi direktori Yesimxan Qanaatovning aytishicha, Nukusga uch-to‘rt yil avval kelgan odam bugun shaharni taniy olmaydi (buni Nargis Qosimova ham tasdiqladi). Qisqa muddatda o‘lkashunoslik muzeyi binosi, Ibroyim Yusupov nomidagi iqtidorli bolalar maktabi, Amir Temur nomidagi istirohat bog‘i, yirik sport majmuasi, 38 ta ko‘p qavatli uy bunyod etildi. Joriy yil shaharning 16 ta ko‘chasida kapital ta’mirlash ishlari olib borilmoqda, jami 12 ta yirik obyekt qurilishi rejalashtirilgan.
Nukus manzaralariga andarmon bo‘lib, media tur ishtirokchilarining mehmonxonadagi ilk yig‘iniga ham biroz kechikibmiz. Tashkilotchilar avval qatnashchilarni bir-biriga tanishtirdi, so‘ng loyiha haqida qisqacha ma’lumot berdi.
— Loyiha “O‘zbekistonda suv va ekologik masalalar bo‘yicha xabardorlikni oshirish hamda hamkorlikni rivojlantirish” deb nomlangan. Asosiy maqsad suv resurslaridan samarasiz foydalanish davom etgan taqdirda buning oqibatlari yanada ayanchli bo‘lishini tushuntirish va ogohlantirishdan iborat, — deydi MOMEM O‘zbekiston ofisining jamoatchilik bilan aloqalar bo‘yicha mutaxassisi Yekaterina Ustinenko. — Markazimiz 17 yil avval, 2001-yilda Yevroittifoq va BMT Taraqqiyot dasturi qarori bilan yuzaga kelgan.
Bosh ofis Olmaotada joylashgan, Markaziy Osiyoning barcha davlatlari, jumladan, O‘zbekistonda 2006-yildan beri faoliyat ko‘rsatib kelmoqda. O‘zbekiston iqtisodi uchun suv juda muhim resurs: hududimizdagi suvlarning 80 foizi transchegaraviy, qolaversa, 90 foiz suv qishloq xo‘jaligida sarflanadi. Undan oqilona foydalanish iqtisodning o‘sishi va ekologik barqarorlikni ta’minlashda katta ahamiyatga ega. Safarimizga kelsak, bu jurnalistlar uchun amalga oshirilayotgan uchinchi media-tur, biroq oldinlari Mo‘ynoq bilan cheklangan bo‘lsak, bu gal ilk bor bevosita Orolgacha boramiz.
Tashkilotchilar jurnalistlarni qiziqtirgan savollarga javob berdi, gid vazifasini o‘taydigan tarixchi Oktabr Do‘spanov bilan tanishtirdi, loyiha ramzlari tushirilgan futbolkalar tarqatdi.
11-may kuni tongda 12 ta Toyota yo‘ltanlamasidan iborat kortej Nukusdan Qo‘ng‘irotga yo‘l oldi.
(Davomi bor)
Izoh (0)