Iroqda parlament saylovlari vaqtida terakt uyushtirishni niyat qilgan ikki xudkush yo‘q qilindi

Iroqning Diyala viloyati huquq-tartibot organlari bugun, 12-may kuni boshlangan parlament saylovlarida terakt uyushtirishni rejalashtirgan ikki nafar terrorchi-xudkushni yo‘q qildi. Bu haqda mahalliy qonunchilik majlisining xavfsizlik qo‘mitasi rahbariga asoslanib, “RIA Novosti” xabar berdi.

Uning so‘zlariga qaraganda, terakt uyushtirishni rejalashtirgan shaxslar avtomatlar bilan qurollangan va “xudkush kamari”ni taqib olgan bo‘lgan. Terrorchilar parlament saylovlari boshlanishidan bir necha soat oldin, Diyala viloyatidagi qishloqlardan birida yo‘q qilingan.

Iroqda parlament saylovlari 12-may kuni mahalliy vaqti bilan soat 07:00 dan boshlangan. Saylovlar mamlakatda IShID terrorchilik tashkiloti bosqinidan so‘ng birinchi marta bo‘lib o‘tmoqda.

Iroq Oliy mustaqil saylov komissiyasining ma’lumotlariga ko‘ra, mamlakatdagi 36 million aholining 24 millioni yangi deputatlarni saylash jarayonida ishtirok etishi mumkin. Ta’kidlanishicha, parlamentdagi 329 ta deputatlar o‘rnini egallash uchun 7 mingdan ziyod odam o‘z nomzodini qo‘ygan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.