AQShning Nyu-York shahrida o‘tkazilayotgan BMTning o‘rmonchilik bo‘yicha Forumining 13-sessiyasida O‘zbekiston vakillari faol ishtirok etmoqda, deb yozadi O‘zA.
Unda xalqaro miqyosda o‘rmonchilik sohasida amalga oshirilayotgan ishlar, 2017—2030-yillarga mo‘ljallagan strategik rejalarning amalga oshirilishi, grant mablag‘larini jalb etishga ko‘maklashish, resurslarni baholash va monitoring qilish borasidagi masalalar muhokama qilinmoqda.
Tadbir doirasida O‘zbekiston O‘rmon xo‘jaligi davlat qo‘mitasining matbuot xizmatidan ma’lum qilishlaricha, vakillar Jahon banki vakili Garo Batmanian bilan uchrashgan. Maqsad O‘zbekiston o‘rmonchilik sohasiga 60 million dollar miqdorida kredit ajratilishi va 10 million dollar miqdorida grant mablag‘lari yo‘naltirishni muhokama qilish edi.
Garo Batmanian Yashil iqlim jamg‘armasi grant mablag‘larini hamda Global ekologik jamg‘armalari mablag‘larini jalb etishga ko‘maklashishga tayyor ekanligini bildirib, o‘rmonchilarni qo‘llab-quvvatlashini bildirdi.
Turkiya o‘rmon va suv xo‘jaligi vazirining birinchi o‘rinbosari Akif Uzkaldi boshchiligidagi delegatsiya bilan “FAO -Turkiya hamkorlik” dasturi doirasida O‘zbekistonda qariyb 5 million dollarlik loyihani amalga oshirish borasida muzokaralar olib borildi. Natijada O‘zbekistondagi milliy bog‘lar infratuzilmalarini rivojlantirish va ihota o‘rmonlar tashkil etish loyihasini yaratishga kelishib olindi.
Izoh (0)