“Xalq so‘zi” gazetasida o‘z xizmat burchini ado etayotgan paytda qahramonlarcha halok bo‘lgan mayor Elyor Choriyev xotirasiga bag‘ishlangan maqola chop etildi. Quyida maqola to‘liqligicha e’tiboringizga havola etiladi.
Elyor Choriyev 1984-yil 23-martda Samarqand viloyati Pastdarg‘om tumanida tug‘ilgan. Shu tumandagi 15-maktabni bitirgach, 2002—2006-yillarda Toshkent oliy umumqo‘shin qo‘mondonlik bilim yurtida tahsil olgan. 2016-yilgacha Davlat xavfsizlik xizmatining chegara qo‘shinlarida turli lavozimlarda faoliyat yuritgan. 2016-yil 18-oktabrda Farg‘ona viloyati hududida navbatdagi jangovar topshiriqni bajarish chog‘ida “MI 171 Ye” vertolyotining halokatga uchrashi oqibatida vafot etgan.
El-u yurt xavfsizligini ta’minlash, o‘z xizmat burchini bajarishda ko‘rsatgan mardligi, fidoyiligi uchun mayor Elyor Choriyev O‘zbekiston Respublikasi Prezidentining farmoniga ko‘ra vafotidan so‘ng “Jasorat” medali bilan taqdirlangan. Elyorning bolaligidan intizomli bo‘lib o‘sgani, har bir narsada tartibni saqlashga o‘rgangani ulg‘aygach kasb tanlashida ham namoyon bo‘ldi. U o‘z oldiga harbiy bo‘lishni qat’iy maqsad qilib qo‘ydi.
“O‘g‘limning bu kasbni tanlashida akasining ham o‘rni bo‘lgan, deb o‘ylayman. U ayni vaqtda mamlakatimizdagi harbiy qismlardan birida aviatsiya bo‘linmasida xizmat qilyapti. Umuman, qarindoshlarimiz orasida olti nafar harbiy xizmatchi bor va turli unvonlarga ega. Elyorjon ham bu yo‘ldan borib, el-u yurtimiz tinchligi uchun jonini fido etdi”, — deydi Elyorning otasi Ahmad Choriyev.
Elyor yoshligidan kurash bilan jiddiy shug‘ullandi, yaxshigina chavandoz bo‘ldi va xalq o‘yini ko‘pkarilarda qatnashdi. U ayniqsa fizika, matematika fanlarini chuqur o‘rganardi. Fanlar bo‘yicha olimpiadaning viloyat bosqichida g‘olib bo‘lib, respublika finalida ham qatnashgan. Bu unga zamonaviy axborot texnologiyalarini o‘zlashtirishda qo‘l keldi, chunki bugungi armiyani busiz tasavvur qilish qiyin. Elyor Choriyevning ilm olishga, o‘z ustida ishlashga bo‘lgan ishtiyoqi unga ota-onasidan o‘tganini, ularning ikkalasi ham o‘rta maktabni oltin medal bilan bitirishganini faxr bilan aytib yurardi.
“Harbiy qasamyod qabul qilishiga bag‘ishlangan tantanali tadbirga taklif etishgan o‘sha baxtli kun hamon ko‘z o‘ngimda. O‘g‘limning harbiy libos kiyib, o‘z Vatani va xalqiga sadoqat bilan xizmat qilish haqida qasamyod qilgani meni to‘lqinlantirib yuborgandi. Uning qadamidagi shiddat, ovozidagi o‘ktamlikni ko‘rib, ortimda shunday katta suyanch borligini his etganman. Elyorjon mamlakatimiz tinchligi, xalqimiz osoyishtaligini saqlash yo‘lida halok bo‘ldi. Aslida, Vatan ham shunday er yigitlarga suyanar ekan”, — deydi Elyorning onasi Gulnora Po‘latova.Elyor Choriyevning harbiy bilim yurtida jangovar tayyorgarlik, harbiy xizmat sirlarini chuqur o‘zlashtirishda yuqori natijalarga erishgani uchun unga shu yerda ishga qolish taklif etildi. Haqiqiy ofitser xizmatni armiya hayotidan boshlashi kerak, deb hisoblagan Elyor harbiy qismni ma’qul ko‘rdi. Uni Surxondaryo viloyati hududida joylashgan chegara qo‘shinlariga yuborishdi. Harbiy sohada birin-ketin muvaffaqiyatlarga erisha boshlagan yosh ofitserga eng mas’uliyatli vazifalarni ishonib topshirishar edi. Xizmat davrida hayotidagi baxtli voqea ham yuz berdi. U Sadoqat ismli qizga uylandi. Ismi jismiga monand rafiqasi avval qiz, so‘ng o‘g‘il farzandni dunyoga keltirib, sadoqat bilan harbiy xizmatchining murakkab faoliyatidagi o‘ziga xos qiyinchiliklarni birgalikda boshdan kechirdi.
“Elyor akam juda g‘amxo‘r, sadoqatli turmush o‘rtoq edi. Turmush o‘rtog‘im Vatan oldidagi burchini ado etib halok bo‘ldi. Farzandlar ham otasining qahramonligidan chinakam iftixor tuyg‘usini tuyadi. Sakkiz yoshli Gulsanam shifokor bo‘lishni orzu qilsa, olti yoshli Mironshoh kelajakda harbiy bo‘lmoqchi ekanini aytadi. Choriyevlar oilasida bolalar, qaysi kasbni tanlashidan qat’iy nazar, o‘z yurtining munosib fuqarosi bo‘lishiga ishonadi”, — deydi Sadoqat Rahmatova.
“Choriyevlar oilasi hamisha barchaga namuna bo‘lgan. Elyorning ota-onasi unga yaxshi tarbiya berishgan. U kattalarning hurmatini joyiga qo‘yar va buni biz boshqalarga o‘rnak qilib ko‘rsatar edik. Taqdir ekan, hayotdan juda erta ketdi”, — deydi “Istiqbol” mahalla fuqarolar yig‘ini raisi Yunus Mirzayev.
Elyor o‘quvchilik davridayoq yetakchilik qobiliyati bilan ajralib turardi. U bilim olishda qiynalmasdi. Ajoyib sportchi va turli tadbirlarni o‘tkazishda mohir tashkilotchi edi. Ana shu xislatlari uchun uni nafaqat sinfdoshlari, balki pedagoglar ham yaxshi ko‘rardi. Ona tili bilan bir qatorda rus tilini yaxshi bilardi, bu muloqotga kirishish uchun juda asqotdi”, — deydi Pastdarg‘om tumanidagi 15-maktabning rus tili va adabiyoti o‘qituvchisi Eshmurod Boymurodov.
Elyor Choriyev tug‘ilib o‘sgan uyda, alohida xonada qahramon xotirasiga bag‘ishlangan burchak jihozlangan. Bu yerda uning o‘quvchilik davridagi, armiyadagi va oiladagi hayoti aks etgan fotosuratlar qo‘yilgan. Bu xonaga uning sinfdoshlari, do‘stlari tez-tez kelib turadi. Xizmat burchini ado etish paytida halok bo‘lgan Elyor Choriyev bilan nafaqat ota-onasi, turmush o‘rtog‘i va sinfdoshlari, balki ustozlari va hamqishloqlari ham faxrlanadi. Uning oilasidan xabar olish uchun chegara qo‘shinlari qo‘mondonligi vakillari, mahalliy hokimiyat va jamoat tashkilotlarining xodimlari tez-tez kelib turadi. Oilasiga pensiya tayinlanib, yangi uy ajratilgan. Zero, xalqimiz o‘z qahramonlarini, Vatan tinchligi va osoyishtaligi, gullab-yashnashi uchun jonni fido etgan insonlar xotirasini aziz tutadi.
Izoh (0)