Farg‘onada maktab o‘quvchilari desantchilar bo‘linmasida bo‘lib, qo‘l pulemyotidan foydalanib ko‘rdi (foto)

Farg‘ona shahridagi desantchilar bo‘linmasida viloyat mudofaa ishlari boshqarmasi tomonidan akademik litsey va kasb-hunar kollejlari o‘quvchilari uchun ochiq eshiklar kuni o‘tkazildi. Unda 110 nafar o‘quvchilar ishtirok etib, kuzatuv binokllari, granatamyot va qo‘l pulemyotlaridan foydalanish imkoniyatiga ega bo‘ldi. Bu haqda “Daryo” muxbiri Azizjon Ermatov xabar berdi.

9 may – Xotira va qadrlash kuni oldidan yoshlarning harbiy kasbga qiziqishini oshirish maqsadida o‘tkazilgan tadbirda harbiylar tomonidan o‘quvchilarga zamonaviy harbiy-texnika imkoniyatlari, qurol-aslahalardan foydalanish qoidalari haqida ma’lumot berildi.

O‘quvchilar harbiy qismda muddatli harbiy xizmatni o‘tayotgan askarlar uchun yaratilgan sharoit, ularning o‘qish, jismoniy va jangovar tayyorgarlik jarayonlari bilan tanishdi.