Amerikalik Don Gorske o‘z hayoti davomidagi 30 minginchi Big-Makni tanovul qildi va yeyilgan burgerlar soni bo‘yicha jahon rekordini o‘rnatdi. Bu haqda USA Today nashri xabar bermoqda.
Nafaqaga chiqqan qamoqxona qo‘riqchisi Gorske may oyiga kelib 30 minginchi Big-Makni yeyishga so‘z bergan edi va va’dasini bajardi. 64 yoshli erkak rekord burgerni 1972-yilda ilk bor bu taomni tatib ko‘rgan “Makdonalds” restoranlar tarmog‘ida tanovul qildi.
U Big-Makning yubiley sonini tanovul qilishdan avval bir yarim soatlik prezentatsiya o‘tkazdi va shu paytgacha yegan burgerlari sonini qayd etib borgan daftarini ko‘rsatdi.
U odatda haftasiga 14 ta Big-Mak tanovul qiladi. Ularni oldindan xarid qilib qo‘yib, so‘ngra mikroto‘lqinli pechda isitadi. Gorske muntazam shifokorlar tekshiruvidan o‘tib turishi va uning qon bosimi me’yorida, xolesterin miqdori past darajada ekanligini ma’lum qildi.