O‘tgan haftada Irkutsk xalqaro aeroportida 14 kilogramm qurutilgan mevalar hamda yong‘oq mahsulotlari aniqlanib, yo‘q qilindi. Bu haqda Rossiya Qishloq xo‘jalik nazorati xizmatiga tayanib, Sputnik xabar berdi.
Irkutsk viloyati va Buryatiya o‘lkasi bo‘yicha “Rosselxoznadzor” xabariga ko‘ra, ushbu mahsulotlar qonunda belgilangan hujjatlari bo‘lmagani tufayli yo‘q qilingan.
Undan tashqari o‘tgan haftada Rostov-Don shahri aeroportida “Rosselxoznadzor” inspektorlari O‘zbekiston va Tojikistondan kelgan yo‘lovchilar qo‘l yuklarida 10 kilogrammdan ortiq qovurilgan go‘sht, quyruq, chakki va sariyog‘ mahsulotlarini aniqlashgan. Ushbu mahsulotlar ham belgilangan hujjatlarga ega bo‘lmagani tufayli yo‘q qilingan.
Eslatib o‘tamiz, Rossiya hududiga shaxsiy foydalanish uchun umumiy vazni 5 kilogrammgacha bo‘lgan oziq-ovqat mahsulotlari olib kelish mumkin. Go‘sht, sut, pishloq kabi chorvachilik mahsulotlari ham olib kirishga ruxsat berilgan, lekin ushbu mahsulotlar ishlab chiqaruvchi korxona upakovskasida bo‘lishi kerak. Uyda tayyorlangan yoki bozorda sotib olingan, etiketkasi bo‘lmagan mahsulotlar belgilangan tartibdagi sertifikatga ega bo‘lishi kerak.
Shuningdek, dunyoning biror hududida epidemiologik holat yuz bergan vaqtlarda “Rosselxoznadzor” ushbu hududlardan oziq-ovqat mahsulotlari olib kelishni vaqtincha taqiqlab qo‘yishi mumkin.
Izoh (0)