Qashqadaryodagi portlash va yong‘in sababi aniqlandi: nobakor o‘g‘il onasi va singlisini o‘ldirib, jasadlarni yoqib yuborgan

Avval xabar berganimizdek, Qashqadaryo viloyatining G‘uzor tumanidagi xonadonlardan birida ro‘y bergan portlash va yong‘in oqibatida ona-bola M.Turdiyeva va F. Karimova halok bo‘ldi. Bu haqda IIV jamoatchilik va OAV bilan aloqalar boshqarmasi xabar berdi.

Olib borilgan surishtiruv ishlari natijasida quyidagilar aniqlandi:

Marhuma M.Turdiyevaning o‘g‘li, “Do‘stlik” mahallasida yashovchi, 1978-yilda tug‘ilgan A.Turdiyev oldindan bo‘lgan adovati tufayli qasd olish maqsadida 12-aprel kuni soat 15:00 atrofida onasining uyiga boradi. O‘zaro janjal asnosida onasi va o‘gay singlisi F.Karimovani boshi va tanasining turli joylariga temir bo‘lagi bilan urib o‘ldiradi.

A. Turdiyev jinoyatini yashirish maqsadida 13-aprel kuni soat 21:00 larda bu yerga qaytib kelib, jasadlarning ustiga kerosin sepadi. O‘tinxonadagi gaz ballonni ochib, olov yoqib, o‘zi voqea joyidan yashirinadi.

A.Turdiyev qo‘lga olindi.