Kubaning yangi yetakchisi inqilobni davom ettirishga so‘z berdi

Raul Kastro Davlat kengashi va Kuba vazirlar kengashi raisi lavozimini tark etgan Kuba parlamentining tarixiy sessiyasi 19-aprel kuni Gavanada yakun topdi, deb yozadi “RIA Novosti”.

Bir necha o‘nyillik davomida ilk bor Kuba davlati rahbari lavozimini Kastro familiyasiga ega bo‘lmagan odam egalladi — endilikda Davlat kengashiga Migel Dias-Kanel boshchilik qiladi. Avval u Davlat kengashi raisining birinchi o‘rinbosari edi.

Biroq mamlakat yangi rahbari bayonotiga ko‘ra, yetakchining o‘zgarishi Kuba yo‘nalishining o‘zgarishini anglatmaydi. Dias-Kanel o‘zining birinchi chiqishidayoq Kuba kapitalizmga qaytmasligini ma’lum qildi.

Bunda u iqtisodiy modelni yangilashni davom ettirish va o‘zgarmas tashqi siyosatni saqlab qolishga so‘z berdi.