Britaniyalik ayol bitta banan uchun 930 funt to‘ladi

Shervudlik (Buyuk Britaniya) Bobbi Gordon bitta bananni Asda onlayn-do‘konidan xarid qilish uchun 930 funt haq to‘ladi. Bu haqda BBC xabar bermoqda.

Gordonning so‘zlariga qaraganda, dastlab meva 11 penni turgan. Ayol banan uchun ancha ko‘p haq to‘laganligi haqida esa kvitansiyani olgandan so‘ng bilgan. Bank ming funt sterlingdan ortiq qiymatga xaridni amalga oshirgan ayol firibgarlar qurboni bo‘lganligini taxmin qilib, uning kredit kartasini bloklab qo‘ygan.

“Yetti yoshli o‘g‘limga bu bananning har bir bo‘lakchasidan bahra olishi kerakligini aytdim”, — deydi Bobbi Gordon.

Asda vakili nosozlik yuzaga kelganligini ma’lum qildi va xaridorga keltirilgan noqulaylik uchun uzr so‘radi.

“Bananlarimiz ajoyib, lekin bunchalik qimmat turmaydi. Tizimda nosozlik yuzaga kelgan ko‘rinadi”, — ta’kidlaydi supermarket xodimlari.