Aziz Turg‘unboyev — eng yaxshi o‘yinchi, Mirjalol Qosimov — eng yaxshi murabbiy. PFL mart oyining eng yaxshilarini jonli efirda taqdirladi (video)

Kecha, 18-aprel sanasida PFL talqiniga ko‘ra mart oyining eng yaxshi o‘yinchisi, eng yaxshi darvozaboni, eng yaxshi murabbiyi hamda oyning eng chiroyli gollari nominatsiyalari bo‘yicha g‘oliblar aniqlandi. G‘oliblarni taqdirlash marosimi Sport-TV telekanali orqali jonli efirda namoyish etildi.

“Championat.asia” nashri esa oyning eng yaxshilari bilan intervyu uyushtirdi.

“Navbahor” yarim himoyachisi Azizbek Turg‘unboyev PFL talqiniga ko‘ra mart oyining eng yaxshi futbolchisi va eng chiroyli goli muallifi deb topildi. Turg‘unboyevning AGMK bilan o‘yinda jarimadan urgan goli Superligada mart oyining eng chiroyli goli sifatida e’tirof etildi.

Bugun ajoyib taqdirlash marosimi bo‘lib o‘tdi. Bundan juda xursandman. Bu faoliyatimdagi birinchi yutug‘im. Sovrin faqat bir meniki emas, jamoadoshlarim yordamisiz va qo‘llab-quvvatlagan muxlislarsiz bunga erisha olmasdim. Keyinchalik yana o‘zimni ko‘rsatishga va chiroyli gollar urishga harakat qilaman. Bu mavsum kubokda “Andijon”ga yutqazib qo‘ydik. Bor e’tiborimiz chempionatga qaratilgan. Oldimizga katta maqsadlar qo‘yganmiz. Xudo xohlasa, chempionlikka kurashadigan jamoa tuzishga harakat qilamiz.

Safardagi mag‘lubiyatlar? Futbolda hamma narsa bo‘ladi. “So‘g‘diyona”dan uchralgan mag‘lubiyatdan so‘ng jamoa ruhiy tushkunlikka tushib qoldi. Shu bois Andijonda o‘yinimiz qovushmadi. Mavsumni kuchli uchtalikda yakunlashga kuchimiz yetadi.

Yulduzlik kasali? Bunday narsani o‘zimga ep bilmayman. Futbolchi o‘zini biroz erkin qo‘ysa sinib qolishi mumkin. Shu bois bu narsalardan uzoqda bo‘laman.“Navbahor” bilan bir yillik shartnomam bor. Agar Superliganing boshqa kuchli klublardan taklif bo‘lsa? O‘ylab ko‘raman.

Azizbek Turg‘unboyev, “Navbahor” yarim himoyachisi

“Bunyodkor” ustozi Mirjalol Qosimov PFL talqiniga ko‘ra mart oyining eng yaxshi murabbiyi deb topildi. “Qaldirg‘ochlar” Qosimov boshchiligida dastlabki 4 ta turda umuman mag‘lub bo‘lmadi. “Bunyodkor” o‘z maydonida “Paxtakor” va “Buxoro”ni mag‘lub etdi. Farg‘onada “Neftchi” taslim etildi. Yana bir uchrashuvda AGMK bilan durang qayd etildi. “Bunyodkor” mart oyida Superligada eng ko‘p 10 ochko to‘plashga muvaffaq bo‘ldi.

Berilgan mukofot bir o‘zimning yutug‘im emas. Jamoamiz, yordamchilarim va shogirdlarimning yutug‘idir. Sababi muxlislarga yoqadigan o‘yinlarni aynan shogirdlarim ko‘rsatishmoqda. Bu sovrin yanada izlanishga undaydi. Eng yaxshi bo‘lganim bizni to‘xtatib qo‘ymaydi. O‘zbekiston Kubogiga qur’a tashlash marosimi ilk bor Sport-TV orqali jonli efirda namoyish etildi. Bu, albatta, shaffoflikka qo‘yilgan qadam. Kubokda bizga Jizzaxning “So‘g‘diyona” klubi raqib bo‘ldi. Biz har bir o‘yinda chiroyli o‘yin ko‘rsatib finalga qadar yetib borishni maqsad qilib qo‘yganmiz. Barchasini vaqt ko‘rsatadi.

Mirjalol Qosimov, “Bunyodkor” bosh murabbiyi

“Bunyodkor” darvozaboni Murodjon Zuhurov PFL talqiniga ko‘ra mart oyining eng yaxshi darvozaboni deb topildi. Zuhurov mart oyida ikkita uchrashuvda maydonga tushib, o‘z darvozasi daxlsizligini saqlab qoldi.

E’tibor uchun rahmat. Birinchi marta o‘tkazilayotgan taqdirlash marosimida birinchi bo‘lganimdan xursandman. Birinchi navbatda bu jamoadoshlarimning ko‘magi. Shunday davom etishni xohlayman. Keyinchalik ham shunday sovrinlar olishga urinamiz. Har doim hujumchilarga e’tibor katta bo‘lardi, endi darvozabonlarga ham o‘zlarini ko‘rsatish uchun imkoniyat yaratishadi. O‘tgan oyda Botirali Ergashev va Eldorbek Suyunov kabi darvozabonlar menda yaxshi taassurot qoldirdi.

Murodjon Zuhurov, “Bunyodkor” darvozaboni