Turkiya prezidenti Rajab Toyyib Erdo‘g‘on rasmiy Anqara AQSh, Buyuk Britaniya va Fransiya tomonidan Suriyaga berilgan aviazarbalarni ijobiy qabul qilgani va buni Suriyaning Duma shahrida kimyoviy hujum uyushtirilgani haqidagi xabarlar uchun asosli jazo deb hisoblashini ma’lum qildi. Bu haqda “RIA Novosti” xabar bermoqda.
“Biz bu oqshom uxlaganimiz yo‘q, Suriyadagi vaziyatni kuzatib bordik. Biz bu operatsiyani to‘g‘ri, deb hisoblaymiz. Chunki kimyoviy hujumni jazosiz qoldirib bo‘lmaydi. Aybdorlar jazosini olmog‘i kerak”, — dedi Erdo‘g‘on.
Erdo‘g‘on, shuningdek, Suriya prezidenit Bashar Asad boshchiligidagi tuzumni muxolifatni qirishda aybladi.
“Bu tuzum nafaqat kimyoviy, balki oddiy qurol bilan ham odamlarni o‘ldiryapti. Oddiy qurolda kimyoviy qurol bilan o‘ldirganidan ko‘proq o‘ldiryapti”, — dedi Turkiya davlat rahbari.
“Suriyada xalqning tinch va xotirjam yashashi uchun ham Bashar Asad tuzumiga qarshi, ham IShIDga qarshi, ham boshqa terrorchilarga qarshi yagona nuqtai nazar bilan harakat qilish kerak”, — deya qo‘shimcha qildi Erdo‘g‘on.
Izoh (0)