Bir guruh harbiylar 101 bahorni qarshilayotgan Ikkinchi jahon urushi qatnashchisi, Mudofaa vazirligi faxriysi Zubaydulla ota Toshmatov xonadonida mehmon bo‘ldi, deb xabar bermoqda Mudofaa vazirligi matbuot xizmati.
“Chirchiq shahri Alisher Navoiy ko‘chasidagi 46-xonadonga tashrif buyurgan Toshkent harbiy okrugi faxriylar ishlari bo‘yicha kengashi raisi Avazbek Nomozov, Chirchiq oliy tank qo‘mondonlik-muhandislik bilim yurtidan podpolkovnik Bobur Rajabov, mayor Jasur Hakimov hamda serjant va ofitserlarni otaxonning qizlari Mastura opa kutib oldi”, — deyiladi xabarda.
“Bugungi kunlarni qarang. Tinchlikni, farovonlikni nainki odamlar hayotidan, balki osmonda parvoz etayotgan qushlardan ham bilsa bo‘ladi. Yoshligimiz zambaraklarning gumburlashi, bombalarning yerni zir titratib, tanklarning guvillashlari, urushdan keyingi qiyinchiliklar bilan o‘tdi. Urush kechagidek esimda. Polshadan to 1945-yil 7-may kuni Germaniyaning Elba daryosi bo‘yidagi janggacha kurashdik. Shu vaqt oralig‘ida olti marta yaralandim. Kechalari okoplarda izg‘ib, qo‘limizda qurol bilan qachon urush tugarkin, qachon ota-onamizning diydorini ko‘rarkanmiz, deb tong ottirardik. Millatimiz tinchliksevar xalq. Urushgacha xalqimizga sobiq tuzum boshqacha munosabatda bo‘lgan. Bosmachilar degan tamg‘a ostida yashab, urush boshlanganda o‘zbekistonliklarning kuchidan front ichida ham, front ortida ham foydalangan. Yurtdoshlarimiz jangda fidoyilarcha kurashi bilan e’tibor qozongan”, — deydi otaxon mehmonlar bilan suhbat qurarkan.
“Yettita farzandning otasi, 21 nafar nevara, 45 evara, 2 chevaraning suyukli bobosi bo‘lgan otaxon gohida evaralariga urush haqida ertaklar aytib berarkan. Ha, aynan urush haqida. Aslida millionlab insonlarning hayotida ulkan qora chiziq bo‘lgan, bag‘rida ketmas dog‘ qoldirgan urush bu. Lekin bugungi hurlikning erka farzandlari uchun bu xotiralar chindan-da, ertak”, — deyiladi xabarda.
“Biz bunday otaxonlar bilan ko‘proq uchrashishga, ularning nasihatlarini yoshlarga yetkazishga harakat qilamiz. Ular tarixning tirik kitobi, deyish mumkin. Ulardagi jasorat, matonat, yurtga sadoqat har birimizga o‘rnakdir”, — deydi Toshkent harbiy okrugi faxriylar ishlari bo‘yicha kengashi raisi Avazbek Nomozov.
Izoh (0)