Toshkent shahar hokimiyati delegatsiyasi Toshkent va Sietl o‘rtasida birodarlik aloqalari o‘rnatilganligining 45 yilligi hamda Sietlda Navro‘z bayramini nishonlashga bag‘ishlangan tadbirlarni nishonlashda ishtirok etish uchun AQShga keldi. Bu haqda UZ24 xabar bermoqda.
Tantanalarda 400 dan ortiq kishi, xususan, Sietl ma’muriyati, Toshkent—Sietl birodar shaharlar assotsiatsiyasi, Vashington universiteti, o‘zbek diasporasi vakillari, shahar aholisi ishtirok etdi.
Bayram tadbirlari doirasida o‘zbek raqs guruhlari, musiqachi va ijrochilar tomonidan madaniy dasturlar, milliy libos ko‘rgazmasi hamda O‘zbekiston bilan bog‘liq fotomateriallar namoyishi bo‘lib o‘tdi.
Tadbirga so‘zga chiqqan assotsiatsiya vakillari so‘nggi yillarda Navro‘z bayrami Sietl shahrida ommalashganini ta’kidlab, bularning barchasi assotsiatsiyaning 45 yillik faoliyati mevasi ekanini qayd etdi. Sietl shahri kengashi a’zosi Tereza Maskeda o‘z nutqida assotsiatsiyasining faoliyatni hamisha qo‘llab-quvvatlashini bildirib, bu sa’y-harakatlar ikki mamlakat xalqlari o‘rtasidagi munosabatlar hamda madaniy, ma’rifiy va ishbilarmonlik aloqalarini mustahkamlashga qaratilganini e’tirof etdi.
O‘zbekiston tomonidan delegatsiya rahbari, Toshkent shahar hokimi o‘rinbosari Dilbar Najmiddinova va O‘zbekistonning Qo‘shma shtatlardagi Favqulodda va muxtor elchisi Javlon Vahobov so‘zga chiqdi. Delegatsiya vakillari Sietl shahrida istiqomat qilayotgan yurtdoshlar bilan ham uchrashdi. Ular bilan O‘zbekistonni rivojlantirish haqida fikr almashildi. Facebook, Amazon va Microsoft kompaniyalari mutaxassilari bilan birgalikda O‘zbekiston dasturchilari uchun malaka oshirish kurslari va seminarlar o‘tkazish imkoniyatlari muhokama qilindi.
Muzokaralar davomida Sietl shahrida O‘zbekiston yoshlar ittifoqining boshlang‘ich tashkilotini ochish to‘g‘risida qaror qabul qilindi. Ittifoqning Toshkent shahar kengashi tomonidan shu yilning sentyabr oyigacha diasporaga 1000 ta o‘quv va badiiy adabiyotlar taqdim etiladigan bo‘ldi.
Tashrif doirasida Toshkent shahar hokimiyati delegatsiyasi Sietl shahar kengashi yig‘ilishida ham ishtirok etshdi. Kengash rahbari ikki shahar o‘rtasida birodarlik aloqalari o‘rnatilganligining 45 yilligi munosabati bilan rasmiy proklamatsiyani o‘qib eshittirdi.
Sietl vitse-meri Ranganatan bilan o‘tkazilgan uchrashuvda mezbon tomonidan boshqa 22 ta birodar shahar orasidan aynan Toshkent bilan hamkorlik faol mustahkamlanayotganligi qayd etildi.
Ma’lumot uchun, Sietl MDHdagi shaharlar orasida birinchi bo‘lib Toshkent shahri bilan birodar shahar maqomiga ega bo‘lgan.
Izoh (0)