O‘zbekistonda bojxona xodimlarining xizmat davomida zimmasiga yuklangan vazifalarni qay darajada ado etayotganligi, hushyorligi va ogohligini sinovdan o‘tkazish maqsadida 16 marotaba xufyona tekshiruvlar o‘tkazildi. Bu haqda “Xalq so‘zi” xabar bermoqda.
Qo‘mita tomonidan pora berish va pora olishning huquqiy oqibatlari haqida ko‘rgazmali qurollar, plakatlar va stol ustiga qo‘yishga mo‘ljallangan bukletlar ishlab chiqilgan bo‘lib, barcha bojxona boshqarmalari, komplekslari va postlariga tarqatilgan. Profilaktik ma’ruzalar, uchrashuvlar, individual tartibda profilaktik tarbiyaviy ishlar va suhbatlar o‘tkazilgan. Ularda bojxonachilarning oila a’zolari ishtirokini ta’minlashga alohida e’tibor qaratilgan.
Shu kabi ma’lumotlar yaqinda Toshkent shahar bojxona boshqarmasida Davlat bojxona qo‘mitasi hamda “Toshkent-AERO” ixtisoslashtirilgan bojxona kompleksi bilan hamkorlikda shaxsiy tarkib va tashqi iqtisodiy faoliyat qatnashchilari ishtirokida “Korrupsiya — ma’naviyat va taraqqiyot dushmani” mavzusida tashkil etilgan navbatdagi davra suhbatida alohida ta’kidlandi.
Muloqot Oliy Majlisi huzuridagi Qonunchilik muammolari va parlament tadqiqotlari instituti, O‘zbekiston nodavlat notijorat tashkilotlari Milliy assotsiatsiyasi va O‘zbekiston musulmonlari idorasi bilan hamkorlikda tashkil etildi.Tadbirda mavzuga doir ma’ruzalar tinglandi hamda bojxona organlarida korrupsiyaga qarshi kurash borasida amalga oshirilayotgan ishlarga alohida e’tibor qaratildi.
Izoh (0)