Samarqandda charter reys bilan O‘zbekistonga uchib kelgan yaponiyalik sayyohlar kutib olindi

Turizmni rivojlantirish davlat qo‘mitasi, O‘zbekistonning Yaponiyadagi elchixonasi hamda Samarqand viloyati hokimligi tomonidan Yaponiya xalqaro turistik assotsiatsiyasi bilan hamkorlikda joriy yilda ham kunchiqar yurt fuqarolarining to‘g‘ridan-to‘g‘ri parvozlar orqali O‘zbekistonga sayohati yo‘lga qo‘yildi.

— O‘tgan yil davomida 10 ta charter reys orqali Yaponiya fuqarolarining O‘zbekistonga sayohati uyushtirilgan bo‘lsa, bu yil qatnovlar sonini 15 taga yetkazish ko‘zda tutilgan, — deydi Turizmni rivojlantirish davlat qo‘mitasining Samarqand viloyati hududiy boshqarmasi boshlig‘i vazifasini bajaruvchi Dilshod Narziqulov. — Ushbu sayohatlarda 3000 ga yaqin yaponiyalikning mamlakatga kelishi kutilmoqda. Sayyohlar bir hafta davomida Samarqand, Buxoro, Xiva va Toshkent shaharlarida bo‘lib, tarixiy-madaniy yodgorliklar, milliy an’ana va qadriyatlar bilan tanishadi. Bu yil sayyohlik yo‘nalishlari va dasturlarini mehmonlarning talab va istaklari asosida, ularning qiziqishlariga qarab tashkil etishga alohida e’tibor qaratildi.

Yaponiyalik sayyohlar uchun Samarqand shahridagi Registon maydonida mahalliy usta-hunarmandlar tomonidan tayyorlangan mahsulotlar, milliy liboslar namoyishi, folklor jamoalari chiqishlari hamda 3D shou tomoshasi rejalashtirilgan.