2018-yilning 2-aprel kuni O‘zbekiston Respublikasi Tashqi ishlar vazirligida Xalqaro migratsiya tashkiloti (XMT) Bosh direktori Vilyam Leysi Sving boshchiligidagi delegatsiyasi bilan uchrashuv bo‘lib o‘tdi. Bu haqda TIV matbuot xizmati xabar bermoqda.
Ayni paytda O‘zbekiston XMTga a’zo emas. Mazkur tashkilot vazifasiga migratsiya masalalarini hal qilishda ko‘maklashish, ushbu sohadagi xalqaro hamkorlikni rivojlantirish kiradi.
TIVda bo‘lib o‘tgan suhbat chog‘ida O‘zbekiston va XMT o‘rtasidagi o‘zaro hamkorlikni rivojlantirishning istiqbolli yo‘nalishlari muhokama qilindi.
O‘zbekiston tashkilot faoliyatida to‘laqonli a’zo sifatida qatnashish imkoniyatini ko‘rib chiqayotganligi XMT delegatsiyasiga ma’lum qilindi. Shu nuqtai nazarda o‘zaro munosabatlarni mustahkamlash va kengaytirishdan ikki tomon ham manfaatdor ekanligi tasdiqlandi.
XMT delegatsiyasining O‘zbekistonga tashrifi dasturidan O‘zbekiston Respublikasi Prezidenti huzuridagi Xavfsizlik kengashi, Hukumati, Bandlik va mehnat munosabatlari hamda Ichki ishlar vazirliklari va Bosh prokuraturada uchrashuvlar o‘tkazish o‘rin olgan.
Izoh (0)