Namangan viloyatining Pop tumanidagi “Pillakash” mahallasida Langar ota qabristonida qadim tarixga ega ikkita maqbara mavjud. Hozirda uning ilmiy, ma’naviy va arxeologik qiymati to‘liq aniqlanmagan, deya
xabar beradi O‘zA.
Foto: O‘zARivoyatlarga ko‘ra, aka-uka Xo‘ja Abdulloh Ansoriy va Xo‘ja Ibodulloh Alamdoriy Arabistondan kelib, 7-asr oxiri va 8-asr boshlarida islom dinini mintaqaga targ‘ib qilish bilan shug‘ullangan. Aka-uka avliyolar qabri 714 yilga oid. Asrlar davomida ziyoratgoh sifatida shakllanilib, ikkita alohida maqbara holatiga keltirilgan. Xo‘ja Abdulloh Ansoriy o‘z davrida shayxulislom maqomini olgan. Bu yer mahalliy aholi tilida Langar ota ziyoratgohi deb yuritiladi.
1937-yilda dinga qarshi kurash avjga chiqqan paytlarda maqbara buzib tashlanadi. 1967-yilda aholi tomonidan qayta tiklanadi. Ayni paytda maqbara ta’mirga muhtoj holatda. Bu esa tuman mutasaddilari va sektor rahbarlari e’tiboridan chetda qolayotganini anglatadi.
Mahalla faxriylaridan Botirjon Nurmatovning aytishicha, unga ota-bobolaridan o‘tib kelayotgan Langar ota ziyoratgohidan topilgan qadim qo‘lyozmalar saqlanib kelayotgan ekan.
Foto: O‘zA“Bir necha bor bu qo‘lyozmalarni olib ketmoqchi bo‘lishdi. Lekin ularga ishonqiramaganim bois bermadim. Bu qo‘lyozmalar qadim tilsimni ochuvchi noyob manba bo‘lishi mumkin”, deydi Botir aka.
Mahallalarda va oilalarda ijtimoiy-ma’naviy muhitni o‘rganish hamda aniqlangan muammolarni bartaraf etishga ko‘maklashish bo‘yicha tashkil etilgan Respublika ishchi guruhi “Pillakash” mahallasida bo‘lganida Langar ota maqbarasini ham borib ko‘rdi. Mazkur yodgorlikning ahamiyati va tarixiy qiymatini baholash uchun Fanlar Akademiyasining tegishli institutlariga murojaat qilish va “Yo‘l xaritasi”ga kiritish vazifasi tuman mutasaddilariga tavsiya etildi.
Izoh (0)