Islom Karimov nomidagi fondning Facebook’dagi sahifasiga 1991-yilgi Navro‘z bayrami tantanalari aks etgan video joylandi va ushbu bayramning O‘zbekistonda nishonlanishi tarixiga nazar solindi.
“Prezident Islom Karimov xalqimizning madaniy-tarixiy merosi tiklanishini milliy uyg‘onishning asosiy omili deb hisoblaganlar. Shu o‘rinda, Navro‘z ayyomining ko‘p asrlik nishonlanish an’anasi, yurtimiz yangi tarixida davlat bayrami maqomiga ega bo‘lgan ilk bayramlardan biri bo‘ldi.
O‘zbekiston rahbarligiga kelgandan so‘ng, 1989-yil 24-iyunda Islom Karimov “Biz endi eskicha yashay olmaymiz, vaqtning o‘zi bunga yo‘l qo‘ymaydi”, — degan dadil so‘zlarni katta minbardan turib aytganlar.
O‘zbekiston Respublikasi mustaqil deb e’lon qilinguniga qadar, 1990-yilda Islom Karimov katta jasorat namoyon etib, ittifoq respublikalari orasida birinchi bo‘lib, Navro‘zni nishonlash an’anasini tiklash tashabbusi bilan chiqdilar. Islom Karimov Navro‘z ayyomini xalq bayrami, 21-martni esa dam olish kuni deb e’lon qildilar.
Ammo shuni ta’kidlab o‘tmoq joizki, “Navro‘z” bayram deb e’lon qilingan ilk yili ushbu kunni milliy bayram sifatida nishonlashga odamlar ongi hali tayyor emas edi. O‘tmish mafkurasi va yillar davomida yig‘ilgan jiddiy iqtisodiy va ijtimoiy muammolar tufayli xalqning aksariyat qismi tomonidan Navro‘z shodiyonasi “qo‘shimcha dam olish kuni” sifatidagina qabul qilindi. Ko‘p asrlik insoniylik qadriyatlari qayta tiklangan yangi jamiyat barpo etish, aslida, oson vazifa emas edi. Biroq, birinchi Prezidentimiz boshchiligida bosqichma-bosqich amalga oshirilgan sa’y-harakatlar natijasida ushbu qadimiy bayramni nishonlash yana urf-odat tusiga kira boshladi. Yurtimizning barcha vohalarida sumalak, halim, ko‘k somsa kabi taomlarni tayyorlash, ko‘pkari va kurash bo‘yicha musobaqalar uyushtirish an’analari qayta tiklandi. Mustaqillik yillari davomida, Navro‘z ayyomi – millati, tili va dinidan qat’i nazar barcha yurtdoshlarimiz uchun katta shod-xurramlik bilan kutib olinadigan sevimli, chinakam umumxalq bayramiga aylandi.
Navro‘zda barcha ginalar unutilib, insonlar o‘rtasida yaxshilik, mehr-muruvvat va saxiylik kabi ezgu fazilatlar yanada kuchliroq namoyon etiladi. Shodiyona kunlarida bemorlar, keksalar, ehtiyojmand oilalar holidan xabar olinadi, insonlar o‘z quvonchi va shodligini yaqinlari, do‘st-u yorlari bilan bo‘lishadilar.
2010-yilda BMT 21-martni xalqaro Navro‘z kuni deb e’lon qildi. 2016-yilda esa Navro‘z bayrami YuNESKOning Nomoddiy madaniy merosi ro‘yxatiga kiritildi.
‘Tarixiy xotirasiz kelajak yo‘q’ nomli kitobida Islom Karimov ta’kidlaganidek, ‘Biz xalqni nomi bilan emas, balki madaniyati, ma’naviyati orqali bilamiz, tarixning tag-tomirigacha nazar tashlaymiz’”, — deyiladi xabarda.
https://www.facebook.com/IslamKarimovFoundation/videos/1777751358911816/
Izoh (0)